ضربوا فواتير ومستندات.. أحمد موسى يكشف تفاصيل وقائع فساد "جمعيتي"
كشف الإعلامي أحمد موسى؛ كواليس واقعة الفساد التي ضبطتها الرقابة الإدارية في منافذ جمعيتي التي تقوم بصرف السلع التموينية للمواطنين.
وقال موسى خلال برنامج "على مسؤوليتي" المذاع على قناة "صدى البلد": "أوجه تحيه لهيئة الرقابة الإدارية لجهودها في مواجهة الفساد وفيما يبدو أنهم شغالين دلوقت على منظومة التموين؛ الدعم اللي الحكومة بتدفعه في شبكات فساد بتسرقه".
وأضاف: "الدولة بتعمل دعم للعيش والسلع بـ 127 مليار جنيه؛ في شبكة بتسرق الدعم ويتاجروا في قوات الناس؛ النهاردة لقينا شبكة الرقابة الإدارية أعلنت عنها والأيام الجاية في شبكات تانية هتقع؛ شبكة النهاردة فيها 30 أو 35 شخص؛ كسبوا كام؟ اهدار مال عام كام؟ بكلمكم عن واحدة طيب واللي جاي اخباره ايه".
وتابع: "منظومة التموين لدينا من 12 أو 14 سنة ولكن خلال فترة الرئيس السيسي أصبح في دعم أكتر؛ الدولة اليوم تتحمل رغيف العيش؛ الدولة بتدفع جنيه وحضرتك بتاخده بخمسة قروش مهو دا دعم؛ الدولة هتقربله؟ لا عشان رايح للمواطن اللي عنده بطاقة تموين؛ عندنا 70 مليون بيستفيدوا من دعم الخبز و64 بيستفيدوا سلع".
وأوضح: "كل يوم رغيف العيش اللي حضرتك بتاخده بتطلع 250-270 مليون رغيف يوميا؛ تقدر تروح تاخد عيش ويقولك مفيش؟ لا بس تروح تاخد سلع تقوله عندك سكر يقول مفيش وأنت حقك تاخد سكر".
وأكمل: "اللي مش بيراعي ربنا يقولك معندي سكر وأنت ليك سكر تاخده بـ 12.6 قرش أو معنديش رز خد حاجة تانية؛ في مواطن أخر مرعاش ربنا خد السكر بتاعك وخباه وباعه في السوق السوداء".
وأوضح: "كان في منظومة أن التاجر أو منفذ جمعيتي بيروح لمكتب التموين أو مديرية التموين عشان يعمل تسوية وبعد ما يعمل تسوية روح على المخازن خد الكميات بتاعتك فتروح تاخد الكميات؛ اصرفلي 700 كيلو سكر و700 أزازة زيت والناس تجيلك متلاقيش".
وذكر: "المشكلة مش من الدولة المشكلة من هؤلاء اللي مراعوش ربنا؛ التموين عملوا منظومة لطيفة اللي هو ندخل في الحوكمة ودي أتأخرت؛ وطبقت في محافظتين تلاتة والنهاردة في كل المحافظات معادا القاهرة والجيزة والإسكندرية؛ فلما دخلوا بقي الحوكمة المنفذ الفلاني دة واخد 800 كيلو سكر لقوه على السستم اللي ضاربهم بس 300 والباقي سرقهم ودول حق للناس".
واختتم: "ضربوا فواتير وأوراق ومستندات؛ الرقابة الإدارية كشفت ودا التشكيل الاولاني ومسكوا كمان العضو المنتدب المالي وبنتكلم عن ارقام فوق الـ 35 شخص وطول مهما شغالين هيلاقوا".
