بعد تراجع تصنيف مصر للطيران.. عمرو اديب: "بيعوا جزء منها"

طالب الإعلامي عمرو أديب؛ الحكومة بطرح جزء من شركة مصر للطيران في البورصة من أجل توفير الأموال اللازمة لتطوير الشركة.

وقال أديب خلال برنامج "الحكاية" المذاع على قناة "أم بي سي مصر": "بيعوا جزء منها واستثمروا وكبروا؛ قولي ايه مشكلتك؟ تعالي شوف المصريين وهما نازلين معاك من المطار؛ يقولك ده كلام هي دي الخدمة؛ تقوله تعالي نحسنها أو ندخل معانا شريك أو نطرح منها 10-20% في البورصة فتحسن بقي".

وأضاف: "الاسامي اللي بقولها دلوقت فلوس وإدارة؛ طيران الإمارات الطيران السعودي الطيران التركي؛ إمكانيات وإدارة وفلوس".

وتابع: "ودي عشرة عشرين في المية وحسنها؛ مصر للطيران جابت طيارات جديدة وفي تحسن ولكن تعالي شوف الطيارين والمضيفين بياخد كام؟ بيتعرض عليه في شركات أخرى اضعاف اللي بياخده واما تشوف هما بيشتغلوا قد ايه وبياخد كام متصدقش يعني".

وأوضح: "بيبذلوا أقصى حاجة ممكن يعملوها في إطار الإمكانيات؛ خصخص جزء منها في البورصة وهات قرشين وأنعش بقي؛ الشركة بتخسر من 12 سنة وهي عليها خسائر متراكمة زي مؤسسات كتير جدا؛ الناس بتعمل أقصى ما يمكن في الظروف دي".

وذكر: "أديني إمكانيات؛ أنا كمان امكانياتي ايه؟ كل حاجة في العالم كدة أنت بتصرف كام أنت امكانياتك ايه أنت تقدر تكبر ازاي؟ ومع ذلك أنا بشوف مصر للطيران دي شركة جيدة؛ خدمة جيدة توديك وترجعت وأنت كويس".

وأوضح: "إمكانيات تيجي منين؛ هتزعلوا متشتكوش بقي أنت عايز تحتفظ بيها وأنت بتخسر؛ وهتفضل كدة دخل معاك شريك حد شركة طيران كذا أو كذا". 

وذكر: "هما الاتراك عملوا شركتهم ازاي؟ تيجي تكلم واحد مصري رايح أمريكا يقولك أنا خدت التركية طيب انت هتبات ليلة في المطار يقولك المطار حلو".

وأثار خروج شركة مصر للطيران، لأول مرة في تاريخها من قائمة أفضل 100 شركة عالمية، انتقادات نواب ودفعهم إلى تقديم طلبات إحاطة واستجوابات في البرلمان المصري لكل من وزير الطيران المدني ووزير السياحة.

وذكر النائب كريم طلعت السادات أن خروج شركة مصر للطيران من التصنيف العالمي جاء نتيجة سوء الخدمات المقدمة من قبل الشركة، وتراجع الجودة على الرغم من أن الشركة تتمتع بكوادر وطيارين ذوي خبرات عالية.