عمرو أديب عن أنباء تغيير الحكومة: المهم تغيير السياسات
أكد الإعلامي عمرو أديب؛ أن تغيير رئيس الحكومة دون تغيير السياسات لن يؤدي إلى تحسن مهما كانت قدرات رئيس الوزراء الجديد أو خبراته.
وقال أديب خلال برنامج "الحكاية" المذاع على قناة "أم بي سي مصر": "الانتخابات الرئاسية مكانتش قبلها مرحلة وبعدها مرحلة ولكن كانت علامة على الطريق واحنا ماشيين ومعانا تحدياتنا ومشاكلنا؛ مشاكلنا لازم تتحل؛ انت عندك حاجات لو سألت أي حد النهاردة هيرد عليك؛ لما تقوله الأسعار هيرجع يقولك هو البصل بكام وهو الزيت بكام".
وأضاف: "أنت عندك هذه المشاكل ولازم تتحل؛ يجب أن أنت يكون عندك سياسات لحل هذه الأمور؛ أنت لو جبت مين؛ لقيت ناس بتقول احنا هنجيب مين؛ لو مثلا هتجيب جوارديولا رئيس وزراء مصر ولكن لازم السياسات اللي هتتحط".
وتابع: "في سياسات واحنا شوفنا بدايات واضحة ليها مع بعض الحماس من الصندوق؛ الصندوق عنده حماس يساعدك وفي بعض الأشياء ابتدا يحصلها حلحلة شوية؛ القضية السياسة أية وهتعمل ايه هل انت جاد في بيع الأصول؟ لو جاد يبقي جورديولا هيشتغل؛ هل أنت جاد في التعامل مع أزمة الدولار؟ هل أنت جاد في جذب الاستثمارات يبقي جوارديولا هيشتغل".
وواصل: "لقيت ناس كاتبين رئيس الوزراء اللي جاي هو الأستاذ محمد العريان ودة بقى صاروخ الاقتصاد ولكن في النهاية هو جاي بأي سياسات وهيعمل ايه وانت دخلت على مرحلة يجب أن يكون في تغيرات واضحة جدا في هيكلك الاقتصادي؛ هتتعامل مع دولار البنك ازاي؟ هتقدر تعمله مرونة والا لا".
وأوضح: "أي حد بيتصدى للأمور دي ربنا معاه في الظروف اللي احنا فيها؛ وارجع تاني وأقول طبعا من حق الناس يبقي عندها سكر بسعر جيد وبصل بسعر جيد؛ عندي أمل كبير أن يكون في تغيير في السياسيات في الفترة الجاية وأرى أن هناك مؤشرات لهذا الامر أنه يحدث".
واختتم: "ساعات الوضع الموجود بيحطك أمام حلول معينة واضحة؛ والازمة الاقتصادية ملهاش طريقة واحدة لحلها وهي منظومة لازم تشغل التروس كلها مع بعض؛ لا يمكن هتعرف تشتغل على الأسعار وانت مشتغلتش على العملة".
