ناردين فرج: طلبت حذف الخيانة من "صوت وصورة" لكن المخرج رفض

تحدثت الفنانة ناردين فرج عن دورها في مسلسل "صوت وصورة" الذي عُرض مؤخرًا وحقق نجاحًا كبيرًا، موضحة أنه كان لديها تخوفات كبيرة من قبول تجسيد شخصية المحامية ماجدة علوان.

أضافت خلال حوارها ببرنامج "معكم منى الشاذلي" على قناة cbc، أنها في البداية لم تكن تريد تقديم هذا الدور حتى لا يكرهها الجمهور، قائلة: "لما كلمني المخرج محمود عبد التواب وقريت الدور لقيتها ست شريرة معندهاش أي ضمير فخوفت الناس تكرهني.. وقلت له عمري ما تخيلت في حياتي أعمل دور زي ده".

تابعت: "المخرج قعد يكلمني إن هتعمليه كويس.. وإن هنظهر إن المحامية دي بتكسب أي قضية.. وبتجسد إن هكسب يعني هكسب حتي لو الشخص مذنب".

وأشارت ناردين إلى أنها أحبت تنوع طريقة ماجدة علوان في التعامل مع شخصيات المسلسل، لكنها تخوفت للغاية من جزئية الخيانة، حين يتضح أنها متزوجة من زوج صديقتها التي تسعى لتبرئتها من القضية.

وواصلت: "الورق اتكتب وإحنا بنصور لذلك اتفاجئت إن ماجدة هتطلع متجوزة عصام الصياد.. قلت مش معقول الست دي هتطلع دنيئة بالشكل ده ومعندهاش أي مبادئ لدرجة تخون صاحبتها.. وقلت للمخرج لو نشيل حتة الخيانة دي.. قالي لا أنا عايز الناس تكره الشخصية خالص".

ناردين فرج تكشف بدايات دخولها العمل الإذاعي

وكشفت الإعلامية والفنانة ناردين فرج تفاصيل دخولها مجال العمل الإذاعي، موضحة أنها في البداية تخرجت من كلية التجارة بجامعة الإسكندرية، ثم تزوجت وانتقلت للقاهرة.

أضافت، أنها كانت تستمع دومًا للإذاعة وتتمنى لو أنها أصبحت من مذيعيها، فقررت دخول هذا المجال، وتواصلت مع مسؤول بالإذاعة حينها، كان صديقًا للعائلة، وطلبت منه أن تخضع لاختبار، ويروا إن كانت مناسبة أم لا.

تابعت: "قلت له أنا عاوزة أجرب، اعملي اختبار وشوف لو هنفع.. ولما عملت الاختبار كان ساعتها أحمد يونس هو اللي في الراديو، وبالصدفة كان يونس مقررة ياخد فترة ميشتغلش فيها.. فأخدوني بسرعة جدا مكانه".

واصلت ناردين فرج: "قالوا لي هو قدامه شهر وهيمشي فلازم يعلمك خلال الفترة دي عشان تبدأي على طول، فقعدت شهر بحاله جنب أحمد يونس بتفرج عليه ومكنش بيكلمني خالص.. لحد ما في يوم قالي اقعدي على الميكسر أنا رايح مشوار ربع ساعة وجاي، وكان برنامج هوا قلت له ازاي لوحدي؟ قالي اشتغلي أنا ماشي.. فطبقت اللي شوفته بيعمله والدنيا مشيت".

وعن رأيها في أحمد يونس قالت: "بحترمه جدا وبعتز بيه.. هو أول واحد علمني ازاي اقعد على ميكسر وأشغل المزيكا واتكلم واحضّر ازاي للحلقة".