عمرو أديب يوضح أساليب بعض الجماعات للترويج إلى مقاطعة الانتخابات
أكد الإعلامي عمرو أديب؛ أن جماعة الإخوان وجماعات المعارضة الأخرى تتحدث عن الانتخابات الرئاسية بشكل سلبي قبل أن تبدأ مشيرا إلى أنهم يروجون لفكرة المقاطعة وعزوف المواطنين عن التصويت.
وقال أديب خلال برنامج "الحكاية" المذاع على قناة "أم بي سي مصر": "نمرة واحد هيقولك مقاطعة مش عارف ايه وهتسمع كلمة عزوف؛ نمرة اتنين هتلاقي تريقة شديدة جدا على أي مواطنين هيمارسوا أي شكل من اشكال السعادة بكرة أمام اللجان من الأخوان واللي مش اخوان واللي هما المعارضين الغيورين".
وأضاف: "نمرة تلاتة هتلاقي بكرة يقولك الناس رايحة عشان كذا وعاملين حاجات عشان يلموا الناس؛ مفيش انتخابات يتم قصفها في العالم بالصواريخ الا الانتخابات المصرية؛ مفيش الجلبة والدوشة اللي بتتعلم على أي نوع من الانتخابات الا الانتخابات المصرية؛ هتشوف بقي اللي عامل مميز وعامل كوميك واللي عامل فيديو".
وواصل: "احنا بنتكلم عن 67 مليون واحد ليهم حق الانتخابات بكرة؛ محدش يقدر يقول من موقعي؛ أنا اللي يهمني بكرة 3 حاجات واحد الاشراف القضائي الكامل على كل صندوق وهو امر اعتدنا عليه وأنا الان أفكر يا تري هنعمل ايه بعد كدة".
وأوضح: "اتنين الامن والأمان وأنا واثق منه وأنا شفت المقار الانتخابية معمولة بجمال وحلاوة وشكل يليق بالانتخابات؛ الناس تذهب بأمن وأمان وتعود بأمن وأمان؛ رقم تلاتة الحرية؛ أنت عايز حازم عمر أو فريد زهران او عبد السند او عبد الفتاح السيسي؛ أنت نازل من بيتكم ورايح ترشح أيا كان اللي عايز ترشحه وتعود لبيتك معزز مكرم".
وأكمل: "من معرفتي بالانتخابات هتشوف اقبال جيد في البدايات ثم هدوء ثم اقبال كبير في النهائيات يروح يحط صوته قبل الانتخابات ما تخلص بساعة؛ أنا بقولك اللي هيحصل وأديني قاعد معاك بكرة وبعده لأنه انت عندك مستوى كراهية على مرحلتين".
وواصل: "في مستوى كراهية للرئيس الموجود؛ في ناس عندهم مستوى كراهية عنيف ومن عشر سنين كانوا بيقولوا أنه مش هيكمل سنة؛ هذا الاستمرار الغريب أنه هذا البلد لازم يتهد ودي المرحلة التانية من الكراهية أنت قاعد نفسك تشوفها مطربقة ومش قادرة".
واختتم: "أنت قاعد في مربع أنت الوحيد تعجبك الانتخابات أو لا انت جالس في مربع حواليك 3 دول كل دولة فيها حكمين وأنت الوحيد اللي عندك حكم واحد؛ شكل الانتخابات في هذا العام أفضل كثيرا من الانتخابات اللي فاتت؛ السنادي شايف في الناس المعارضة اللي داخلة في واحد أو اتنين كويسين".
