عمرو أديب عن فيديوهات تعرية المدنيين الفلسطينيين: "الإسرائيلي بينشر لشعبه كذب"
انتقد الإعلامي عمرو أديب الموقف الأمريكي من العدوان الإسرائيلي على قطاع غزة مشيرا إلى أنهم لا يريدون وقف الحرب قبل أن تنتهي إسرائيل من تحقيق أهدافها.
وقال أديب برنامج "الحكاية": المذاع على قناة "أم بي سي مصر": "أنا مش فاهم الأمريكيين في موضوع غزة ولكن أنا فاهم الإسرائيليين عايزين يخلصوا على أكبر قدر من الفلسطينيين".
وأضاف: "الأمريكان بيقولك يجب أدخال المساعدات الإنسانية لغزة ويقولك متقتلش مدنيين كتير اقتل على قد ما تحتاج يعني؛ أنا عايز اسال سؤال أنت بتدخل أكل ومعونات للناس في غزة عشان تموتهم؛ يقولك يجب أن نسمح بوجود مستشفيات وبعدين يقولك لا نستطيع أن نوقف الحرب قبل أن تنجح إسرائيل في القضاء على حماس".
وتابع: "واضح أنه بيقوله كمل؛ لما يبقي 17-18 ألف شهيد لغاية دلوقتي أمتي الرقم يكون مريح للأمريكان؛ سؤال بعد 60 يوم لازم تسأله لو إسرائيل مخلصتش هنعمل ايه بعد 60 يوم إسرائيل مخلصتش والاهداف المعلنة لم تأتي أكلها حتى الأن".
وواصل: "حتى الفلسطينيين اللي شفناهم عراة واللي نشرها الإسرائيلي اكتشفنا انهم من اللاجئين في ملاجئ الأونروا؛ اللي بيعرضه الإسرائيلي لشعبه كذب؛ اسألك بقي سؤال لو كانت حماس جابت الاسرى وقلعتهم ملط وقعدتهم على الأرض كان العالم هيقول ايه؟ احنا نعامل بالانسانية والمحبة وهما يضربونا بالجزم والعالم يسقف".
وأوضح: "الأمريكان يقولك أنا ملاحظتش أي قتل متعمد من إسرائيل للمدنيين الفلسطينيين؛ دي حاجة ميتردش عليها غير بكلمة واحدة؛ الامريكان قالوا موضوع الجنوب دة لسه أخر يناير أنت متخيل يا مؤمن في شهرين الناس دي هتنضرب؟ طيب الناس دي هتروح فين؟".
وأكمل: "مصر دائما كانت جزء من الحل والان أنت ممكن تكون جزء من المشكلة؛ نحن نتحدث عن مخيمات تبعد أمتار عن الحدود المصرية؛ المصريين قالوا للإسرائيليين والامريكان أن هذا الأمر لن نسمح به؛ كان في كلام واضح من المصريين للامريكان والإسرائيليين أنه لا متفكرش".
واختتم: "الناس النهاردة موجودة على حدودك؛ أنا بتكلم على واقع واضح هذا الامر أظن هو الان على رأس أولويات الإدارة المصرية في صور باينة فيها الحدود المصرية من الناحية التانية؛ النهاردة واحد بيتكلم من أهل غزة بيقول احنا اتهجرنا أربع او خمسة مرات في الشهرين اللي فاتوا دول".
