عمرو أديب يدعو المصريين للتصويت في الانتخابات الرئاسية: "انزل علشان نفسك"

دعا الإعلامي عمرو أديب، المواطنين إلى التصويت في الانتخابات الرئاسية، قائلا إن على المصريين اختيار رئيسهم.

وقال أديب خلال برنامج "الحكاية" المذاع على قناة "أم بي سي مصر": "عدينا بمرحلة تزوير الصندوق ودي آخر انتخابات هيكون فيها قاضي على كل صندوق والمسألة معادتش بالسهولة وصوتك محفوظ أدخل قول صوتك وقول أنا عايز فلان واقرأ الموقف واقرأ الإنسان".

وأضاف: "الانتخابات جاية في ظرف غريب أوي؛ انتخابات امتحان أنت الآن في ظروف غير طبيعية أنت لازم كراجل هتنتقي تشوف مين الراجل من الأربعة دول هينفع يكمل في المشوار ده".

وتابع: "جايز الراجل اللي انتخبته النهاردة مش بتاع السنادي ولكن زقه للسنة الجاية؛ احنا بنستعد لانتخابات الرئاسة قبلها بشهر هو في حاجة كده؟ دا لو مركز في أي أي محافظة وحد عايز يترشح عمدة بياخد وقت أكتر من كده".

وواصل: "لغاية قبل الانتخابات تكتل المعارضة مكانش مقرر هيقف مع مين؛ التيار المدني النهاردة مش واقفين ورا المرشح بتاعهم؛ في حد عايز يحكم مصر في شهر؟ متشتغلوا شوية عايزين ديموقراطية وحياة سياسية كافح بقي وناضل".

وأوضح: "بقالنا 20 سنة بيتقالي نفس الجملة أننا لسة في العام الأول من الديموقراطية؛ احنا اللي بنحكم على نفسنا وبنقول على نفسنا كده مش حد من بره؛ أنا مقلتلكش أطلع الجبهة أنا بقولك أنزل اللجنة للجبهة لجان تحميها والأيام الجاية دي هتعرف دور الرجالة دي أيه".

وأكمل: "أنا لا أطلب منك أن تحرر البلاد المحررة ولا أن تبنى السد لأن السد قد تم بنائه أنا أطلب منذ الذهاب إلى اللجنة العملية بتاخد عشر دقائق أنا أظن أننا الشعب الوحيد في العالم اللي بيفكر في جدوى الانتخابات".

وذكر: "ارجوكم لنفسك وليس لمصر وليس للتاريخ وليس للأرقام؛ دا مستقبلك ومستقبل عيالك مش عشان نكيد العوازل أو الإخوان ميشمتوش فينا يولع الإخوان دي مصر ودا مستقبل مصر".

واختتم: "الناس دي نزلت وقالت صوتي دا طلعوا كتير أو قليلين ولكن المحك الجاي يوم 10-11-12 ولكن حسسني أنك مهتم أرمي الشماعات وأنزل أعمل صوتك أنا لا مهتم أنك تغني أو ترقصوا أو تعملوا لقاءات مع الفضائيات أنا مهتم أنك تصوت وتروح".