أحمد موسى: معاهدة السلام ورقة وإسرائيل لا تحترمها
أكد الإعلامي أحمد موسى، أن من يهاجم الدور المصري في مواجهة العدوان على غزة مأجور، مشيرا إلى أن مصر تقدم ما لم يقدمه أحد.
وقال موسى خلال برنامج "على مسؤوليتي" المذاع على قناة "صدى البلد": "عناصر مأجورة وأي حد يشكك في بلدي مأجور واللي مصر بتعمله لفلسطين محدش بيعمله؛ مصر كل جهدها من أجل فلسطين وكل شغلها من أجل القضية الفلسطينية".
وأضاف: "لما احنا بنقول خليك في ارضك متسبهاش لأن عندك مجتمع دولي منافق لما هتسيب أرضك ما هتصدق؛ أنت كنت فين سنة 1947 ولما بعتوا يهود من الكتلة الشرقية كانوا على مساحة 6-7% سنة 1947 وجم سنة 1948 الخطة البريطانية قالك أحنا ماشيين ونروح الأمم المتحدة وفرصة بقى نعمل دولتين واعتراف بقي ياخد أرضك".
وتابع: "أنت جاي النهاردة تتكلم على مجتمع دولي وعالم أرضك متسبيهاش وهو ما هيصدق إذا وأنت قاعد فيها الأمم المتحدة اعترفت بيه وادته الحق أنه ياخد الأرض دي أنت منتظر النهاردة أيه محدش أبدا إلا أنت تتمسك بأرضك سيبك من أي شيء أخر مفيش دولة هتعملك رفاهية إلا في أرضك".
وواصل: "أنت لما بتسيب أرضك وقعدت في فرنسا أو دولة من الدول أنت سبتها ليه هو عايز الـ 2 مليون ميبقوش موجودين دلوقت وهيبلع الأرض؛ خليك في أرضك وفي تمن واحنا دفعنا آلاف الشهداء المصريين وحررنا أرضنا بالدم".
وأوضح: "اللي بيحمي أمني القومي القوات المسلحة وأجهزة الدولة محدش تاني بيحمي مصر عندنا مخابرات عامة وحربية وأمن وطني دي الأجهزة مع القوات المسلحة بيحموا بلدنا؛ هو مين اللي بيحمي أمن مصر؟ محدش يضحك عليك احنا بس الموضوع ده يخلص ولنا كلام".
وأكمل: "الحرب دي تخلص ويكون لنا كلام عشان دة مش وقت الكلام ولكن كله لازم يتقال بالظبط الحكاية على بعضها ووقتها يبقالنا كلام واضح على مواقف الكل ملناش غير بلدنا ولازم بقى عارف كده اللي بيحميك جيشك والداخلية جوة والمخابرات".
وذكر: "أي كلام آخر يبقى يحمي هو نفسه وجيشنا مسؤول عن حمايتنا من أي حد؛ أه عندنا معاهدة سلام بس أنت لو لعبت في الموضوع دي ورقة؛ اه بحترمها ولكن انت مش بتحترمها".
واختتم: "أنا هنا بقول للكيان الصهيوني أنت لا تحترم معاهدة السلام لأن اللي بتعمله الان ليس احترام للمعاهدة ولكن اختراق للمعاهدة أنا بقولك الكلام ده من أكتر من شهرين ملتزمين أه بكل شيء ولكن لا؛ اللي بيتم نتنياهو النهاردة بيقول ايه السلطة الفلسطينية لن تحكم غزة على الاطلاق واحنا مش هنسمح إن إسرائيل تحكم غزة".
