عمرو أديب يعلق على تراجع أسعار الدولار في السوق السوداء

علق الإعلامي عمرو أديب؛ على تراجع الدولار الأمريكي في السوق السوداء ليلامس حاجز الـ 45 جنيها للدولار الواحد.

وقال أديب خلال برنامج "الحكاية" المذاع على قناة "أم بي سي مصر": "إمبارح الدولار سعره نزل في مصر؛ في ناس بتكلم أن سعره نزل 5 جنيه أو ستة جنيه؛ مش ده اللي انا واقف عنده أنما الغريب ياسادة أنه أمبارح كان في حالة هستيريا والحقوا مش ممكن يكون بينزل".

وأضاف: "ما ينزل أحنا عايزينه ينزل وأنا بتكلم عن سعر الدولار في السوق السوداء؛ يبدو كدة أن كان في فريقين؛ فريق أول عنده رغبة أن الدولار يفضل يرتفع وفريق تاني عايز يفضل يقول شوفت اهو بيرتفع شوفت أهي بتتنيل اكتر".

وتابع: "امبارح كان في حالة من حالات عدم التصديق وعدم اليقين؛ الجهة التانية بقى بتاعة الدولار بيهار والناس بترميه ويقولك دا نزل 12 جنيه وبقى بحاجة وتلاتين

وواصل: "الطرفين أمبارح عندهم حالة عدم رشد اقتصادي غريبة جدا؛ النهاردة احنا بنتكلم عن سعر الدولار 45 هل هو هيفضل عند حاجز الـ 45 والا هيكمل معرفش؛ هيطلع تاني معرفش وأنا من الناس اللي محبز جدا لانخفاض سعر الدولار".

وأكمل: "النهاردة في متحدثين من الحكومة معطلين كلام كدة ان أزمة الدولار إلى زوال؛ باشا أنا بحب الزوال دي؛ هو مش لما بينزل الأسعار تنزل؟ أنت دلوقت بتقولي إلى زوال وبتقول كل السوق وكل البشر في مصر يتحدثون عن النزول".

وأوضح: "هل أسعار الأشياء والسلع والاكل هتتراجع؟ أنت بتقولي الزيت والسكر بسبب الدولار؛ مستلزمات انتاج اللبن بتزيد واحنا بنتكلم على دولار اغلبهم بيخدوه من البنك بـ 31 ".

وذكر: "يجب أن تنظر بجدية لحالة الهلع اللي كانت عند ناس كتير وهو بينزل؛ في ناس بتقول شاريين بـ 47-48 وأنا كدة بخسر فيتبدي أما يكب دولار في السوق عشان الخسارة تقل أو يخليه معاه على أمل الزيادة تاني".

واختتم: "أنا سألت قلتلهم ياجماعة هو جه دولار الفترة الأخيرة؟ سالت إيه الفلوس اللي حصلت قالولي في بيعه ضخمة بتاعة الشرقية للدخان وكذا بيعة تانية اتعملت لشركات هل هي السبب معرفش؛ الناس اللي بتكلمنا بتوع مجلس الوزراء مبيقولوش حاجة".