أحمد موسى بعد وصول السكر 60 جنيها: "كفاية.. الأمر فاق احتمال المواطن"
طالب الإعلامي أحمد موسى؛ الحكومة بتدخل سريع لاحتواء الارتفاع المستمر في الأسعار، مشيرا إلى أن الأمر فاق احتمال المواطن.
وقال موسى برنامج "على مسؤوليتي" المذاع على قناة "صدى البلد": "أنا يعنيني المواطن اللي مرتبه بسيط؛ المواطن اللي يادوب على القد؛ المواطن النهاردة لما بننزل السادة المرشحين مهو ده الشارع أزمة الناس ايه الأسعار".
وأضاف: "وأنا بخاطب الرأي العام لازم اخاطبه أيوة هناك مشكلة وأي مسؤول يبقي عارف كدة؛ عندنا أزمة كبيرة؛ ألاقي الدولار في السوق السوداء بـ 52 جنيه أنا استنى ايه تاني الحاجة بتغلى ومفيش سلعة واحدة بترخص".
وتابع: "السكر النهاردة طول ما انت ماشي ألأقي الناس على بوابة المدينة النهاردة السكر معقولة 60 جنيه في المنوفية والناس قاعدة مستنية عشان تقولك معقولة؛ هو رسالته ايه هو بيقولهالي منا عارف؛ هذا المواطن اللي واقف وجاي يقولك كيلو السكر بقي بـ 60 جنيه وأنا كمسؤول محدش يسهل الموضوع ومحدش يبسطه".
وأكمل: "محدش يقولي أصل مش عارف كذا دي مش مشكلة المواطن انا مسؤول أحل عندي والا معنديش مينفعش كل شوية المواطن؛ المواطن يشكر وتحمل كتير؛ سيادة الرئيس دائما يطلع يعمل ايه يشكر الناس عشان تحملوا وصبروا وواقفين مع البلد رغم الظروف".
وأوضح: "أنا عندي مسؤوليات وليا دور وهو أنا مكنتش عارف أن في أزمة سكر بعد شهور؛ يا جماعة عمرنا ما شوفنا الكلام دة أنا بتكلم دلوقت كدة صدمة سكر وصدمة دولار وأسعار النهاردة حماية المستهلك نازلين وعاملين حملة والتموين على طول هو ده الجماعة كفاية الناس بجد الموضوع بقى كتير ياريت حاجة واحدة".
وذكر: "ارجوكم لازم ألية وإجراءات وقرارات؛ مجلس الوزراء دولة رئيس الوزراء مصطفى مدبولي الموضوع مش بسيط".
وتعاني البلاد من أزمة تضخمية خانقة تسببت في ارتفاع أسعار كافة السلع والخدمات بشكل غير مسبوق.
وتضاعف أسعار السلع الغذائية فيما تحاول الحكومة جاهدة السيطرة على التضخم ومراعاة محدودي الدخل وحمايتهم من أثر التضخم كما تقوم الحكومة بتكثيف الرقابة على الأسواق لضبط التجار المستغلين ومنع محاولات التلاعب والتربح من الازمة.
