أحمد موسى يعلق على تصريحات وزير التموين: "مدي مهلة للمواطن والا التجار؟"
علق الإعلامي أحمد موسى؛ على تصريحات وزير التموين الدكتور على المصيلحي والتي أشار فيها إلى إمكانية تطبيق التسعيرة الجبرية على السكر.
وقال موسى خلال برنامج "على مسؤوليتي" المذاع على قناة "صدى البلد": "حاولت النهاردة أحل لغز سيادة الوزير المحترم الدكتور علي المصيلحي وهو من الناس اللي بحبهم على المستوى الشخصي؛ حاولت النهاردة احل لغز؛ سيادة الوزير كان عنده النهاردة حاجة خاصة بالدهب ورمى تصريح أنا واقف قدامه لغاية دلوقت".
وأضاف: "سيادة الوزير قال أدونا 10 أيام ولو منزلش بعد 10 أيام أنا هعرض على رئيس الوزراء إجراءات السعر الجبري؛ سيادة الوزير إذا هو عارف الموضوع بسيط أوي كدا كان خلص لنا الموضوع دة من شهر".
وتابع: "إذا بنحدد تسعيرة جبرية؛ سيادة الوزير أمام الرئيس قال مقدرش أحدد تسعيرة جبرية؛ تسعيرة جبرية مقدرش والا أقدر وإذا هي سهلة أوي ليه أنا سايب الناس شهر بيلفوا حوالين نفسهم عشان كيلو سكر".
وواصل: "لا أتذكر ان الأول دة حصل في وقت من الأوقات بهذه الطريقة؛ أنك تجد حد يقولك السكر النهاردة بأربعين أو خمسين؛ أنا كتبت النهاردة تويته ولقيت الناس بترد وتعلي في الأسعار وحد قال مش لاقيينه أصلا".
وأكمل: "كل واحد يقول كيفما شاء لأن دة بقى مزاد للناس ومزاد لينا كمان؛ عندك 3 أسعار للسكر في مصر؛ عندك 12.6 في التموين و27 في المبادرة التي لم تحقق المراد؛ المبادرة لم تحقق الهدف اللي احنا عايزينه منها ثم عندك بعد كدة السكر اضرب بقي 30—40 والناس النهاردة في مدينة نصر شاريينه بــ60 جنيه ليه وعشان ايه؟".
وأوضح: "احنا عندنا فجوة 450 ألف طن؛ وبالمناسبة كنت أفهم كلام الدكتور علي المصيلحي؛ ليه 10 أيام بتدي مهلة للتجار ولا مهلة للمواطن يلف أكتر؛ ما اعمل القرار النهاردة إذا هو الموضوع بسيط؛ هل في أزمة والا لا طبعا في ازمة النهاردة تلاقي مؤسسات بتقولك الحق عندنا سكر تعالي اشتريه".
واختتم: "المواطن يعمل ايه؛ أمر واقع في ناس في المبادرة لم يلتزموا وفي تجار حاليا أيضا خدوا الحاجة على جنب ومين المسؤول بقي اللي طلع على جنب مين كمواطن النهاردة اللي بيسلمني للتاجر؟ المواطن أحميه بمين مين يوفرله الحماية والسلعة بتاعته بالسعر اللي اتقال عليه دلوقت؛ سعر كيلو السكر وكسبان 27 جنيه".
