عمرو أديب ينتقد بعض الشركات المحلية: "لقوا الناس في حجرهم رفعوا الأسعار"

انتقد الإعلامي عمرو أديب؛ الشركات المحلية التي قامت بزيادة أسعار منتجاتها بعد انطلاق حملة المقاطعة ضد الشركات الأجنبية العاملة في مصر.

وقال أديب خلال برنامج "الحكاية" المذاع على قناة "أم بي سي مصر": "الشعب المصري حمول وصبور؛ ولكن يجب الا تركن الحكومة لذلك والأسعار تزيد كل يوم؛ الشعب المصري عمل مقاطعة ونجح فيها ولكن للأسف الشركات الوطنية الاهلية اللي المصريين راحولها بدل المقاطعة قررت تعمل ايه؟ شركات شاي وأكل ومياه غازية عملوا ايه؟ لما لقوا الناس في حجرهم رفعوا عليهم الأسعار".

وأضاف: "سعر المنتج اللي مش مقاطع بقي أغلى من المنتج المقاطع؛ الناس قدرتك وقالتلك أحنا جايين لك حتى لو أنت أقل جودة هقف جنبك وراح ضارب السعر في اتنين".

وتابع: "انت مش واخد بالك أن بعد ما الأمور دي تخلص أنت هتخرج من السوق تماما؛ أنت عايز تعلي السعر دون رفع للجودة عشان الناس قاطعت منتج أخر أنتوا ليه بتعملوا في الناس كدة هو ده جزاء الناس اللي قاطعت ووقفت جنبك".

وواصل: "اعقلوا كدة ونزل أسعار واستفيد من الزيادة في التوزيع الناس جاتلك متستغلهاش؛ يعني انا أسيب برندات عالمية تعمل فيا كدة؟ دا جزائي أن انا وقفت جنبك؟ دا جزائي أني قررت أساندك رغم مستواك وطعمك؛ زودوا الأول 10% وبعدين 20% وبعدين 50% دا أيه ده دانت أسوأ من التاني".

وذكر: "هو مزاج عند التاجر المصري أنت تستغل الناس أنت بتبيع شاي ايه اللي حصل؟ ليه احنا عملنالك ايه وحش اعقلوا كدة ونزلوا أسعاركم واحتضنوا الناس اللي جاتلكم مطفهشوهمش خلوا عندكم دم بصرف النظر عن المقاطعة احنا في ظروف صعبة ارحموا الناس".

وأطلق المصريون حملات مقاطعة للمنتجات الأجنبية التابعة للشركات التي أعلنت دعمها للاحتلال الإسرائيلي في عدوانه على قطاع غزة.

ونجحت حملات المقاطعة بشكل كبير في تراجع الاقبال على المنتج الأجنبي وزيادة الاقبال على المنتج المصري على الرغم من جودته المنخفضة. 

وفي المقابل قامت بعض الشركات المحلية بزيادة أسعار منتجاتها بالشكل الذي أثار غضب المواطنين الذين قاموا بدعمه وشرائه.