تامر أمين يعلق على زحام الجمعة السوداء: "المحلات كان فيها ضرب"

علق الإعلامي تامر أمين؛ على اقبال المواطنين الكبير على شراء السلع المختلفة خلال تخفيضات الجمعة السوداء أمس.

وقال أمين خلال برنامج "أخر النهار" المذاع على قناة "النهار": "أمبارح كانت البلاك فرايداي؛ والحقيقة قبل ما أتكلم عن اللي حصل أنا كل سنة بفكر في الفكرة دي ومش عارف سببها ايه؛ مين العبقري اللي سماها الجمعة السوداء أكيد مش عبيط اللي سماها كدة؛ أحنا اتعودنا ان الجمعة الأخيرة من نوفمبر العالم كله بيعمل البلاك فرايدي وهي تخفيضات في كل المحلات".

وأضاف: "المفروض أنها حاجة حلوة عشان الناس تشتري ليه الحاجة الحلوة تخليها سودة؛ دي أبتدت في الغرب واحنا نقلناها؛ وبعض المحلات من كتر ماهم مش عاجبهم الاسم خلوها الجمعة البيضاء".

وتابع: "ليه ياجماعة بلاك؛ هو أنتوا كل اللي بيجي من الغرب لازم يبقي بلاك؛ جدتي كانت بتقول مفيش حاجة بتيجي من الغرب تسر القلب؛ والحقيقة كل يوم بيتأكد لنا أن الغرب استعماري واحتلالي ومصلحجي ونفعي وكداب فيما يتعلق بعبارات حقوق الانسان والديموقراطية والعدالة الغرب منفلت وكل حاجة متسرش القلب وبوظت مجتمعاتنا أصلها جاي من الغرب حتى الخصومات جابهولنا جمعة سودة".

وأكمل: "ألهى تبقى جمعة سودة على كل ظالم بياخد حق حد في الدنيا دي ويسكت؛ النقطة التانية كمية الناس اللي في المولات أمبارح بسم الله ما شاء الله؛ يعني مش عارف كان في ضرب؛ كان في محلات فيها ضرب واللي فيكو نزل أكيد شاف وصلت المرحلة أن في محلات فيها ضرب من كتر الزحمة والاقبال والتهافت على شراء السلع؛ أمبارح في أحد الأماكن في الشيخ زايد حدثت خناقة كبيرة أنا مش عارف ده دليل على ايه هل الناس بتفضل تحوش لحد موسم الخصومات مش عارف بس بردو براحة".

وأوضح: "أنا بقولكم براحة الواحد مش عارف القرش بكرة هيجي ازاي القرش عزيز فخلوا بالكم من قرشكم عشان القرش الأبيض ينفع في البلاك فرايدي وربنا يعديها على خير".

واعتادت المحال التجارية في الجمعة الأخيرة من شهر نوفمبر من كل عام على تقديم تخفيضات كبيرة على السلع تصل في بعض الأحيان إلى 50%.