عمرو أديب عن قانون التصالح: "المصريون جاهزين لتوريد 100 مليار للحكومة"

علق الإعلامي عمرو أديب، على موافقة مجلس النواب من حيث المبدأ على مشروع قانون التصالح في مخالفات البناء وقرب صدروه خلال الفترة المقبلة.

وقال أديب خلال برنامج "الحكاية" المذاع على قناة "أم بي سي مصر": "إذا كان في الأوقات العادية عايزين الأمور تمشي بشكل سريع ففي الأوقات الصعبة محتاجين حركة سريعة جدا؛ قانون التصالح وارد جدا يكون نافذ وجاهز للتوقيع من رئيس الجمهورية ويبدأ في التنفيذ".

وأضاف: "قانون التصالح في مخالفات البناء كان بقالنا سنتين تلاتة شغالين فيه والنهاردة كان في موافقة مبدئية على المشروع وغدا سيتم الموافقة على القانون ثم يأخذ مساره الطبيعي".

وتابع: "أقول أمرين الأول أن هذا هو القانون الوحيد في مصر اللي الناس هتجري ورا الحكومة عشان تدفع الفلوس؛ المصريين على استعداد لتوريد ما يقرب من 100 مليار جنيه عن طيب قلب ومجهزين فلوسهم وبيتحايلوا على الحكومة أنها تاخد الفلوس".

وأكمل: "كل فترة حكم بيبقى عندها أشياء تقول إنها عملتها؛ القانون ده والموضوع ده لو أطبق هيوضع في الصفحة الذهبية لهذه الإدارة لأن دة كان شيء مش شبه مستحيل ولكن كان مستحيلا وكان الأمر معالجته تحتاج لكثير من الشجاعة أن تتوقف وتغير أنا مش مكمل كدة البلد دي مش هتكمل عشوائية وكل واحد يبني زي ما هو عايز كل الكلام دة ينتهي اللي موجود في مصر في البناء غير موجود في أي دولة في العالم".

واختتم: "مفيش كدة مفيش اللي عندنا ده غير موجود وأصبحت النتيجة عبث وتشويه عمراني ونصب واحتيال وتعدي على أراضي الغير وأراضي الدولة وأنا بناشد كل مواطن مصري أنه يستغل الفرصة أنت بتعمله لعيالك".