عمرو أديب: "تلاتة أربعة في البلد شغالين في الدولار ولازم الحكومة تتدخل"
أكد الإعلامي عمرو أديب؛ أن ما يحدث من ارتفاع للدولار الأمريكي أمر غير طبيعي على الإطلاق مطالبا الدولة بالتدخل.
وقال أديب خلال برنامج "الحكاية" المذاع على قناة "أم بي سي مصر": "على عيني وراسي أنت واخد بالك من الناس بتوع تكافل وكرامة والبطايق؛ دول لهم علاقة بالتانيين لأن الباقيين لو اتأثروا الناس دي هتتبهدل؛ انت فاكر أن اللي بتديهوله دة اللي هيكفيه؟".
وأضاف: "أنا مش عايز أشوف حد يضحك على الناس بقي كفاية؛ أنا بقولك النهاردة أن في شيء غير طبيعي وفي حد في البلد دي فاهم إيه اللي بيجرا كويس ويقدر يوقف الجنان دة؛ خد بالك أن أحنا وصلنا بمنحنى الطلب لأقل شيء؛ الناس لو قادرة تشتري يبقي ايه المشكلة؟ الناس المنحنى عندهم اتكسر؛ والزيادة بعد كدة لا".
وتابع: "خد بالك في حاجة اسمها الطبقة المتوسطة وفي شريحة انزلقت؛ علبة السجائر اللي ناس كتير متعودة عليها بقت فوق الـ 100 جنيه؛ ولما تيجي تتكلم يقولك أنت مش شايف الدولار بقى بكام؟ طيب وأنت مالك هو أنت بتستورد بجنيه الحج بامبولا والا دولار البنك المركزي".
وأكمل: "انتوا سايبين الفرق دة كله لمين؟ في مليارديرات دلوقت في البلد يا اما شغال في الدولار او مستفيد؛ مليارديرات في البلد وهما تلاتة أربعة كدة يفتح كدة يقفل؛ الدولار دة لازم ينزل؛ أنا ذنبي أيه كمواطن ناس قاعدة بتضارب في الحياة وأنا بنضرب".
وواصل: "أنا مقلتش نجري ورا تاجر العملة؛ تاجر العملة محدش يجري وراه حاشا لله هيطلع حد يقولي العرض والطلب؛ أنا اتهريت طلب ومفيش عرض في مشاكل على عيني وراسي لو دة قدامه في أزمة لازم الوزارة الموجودة دي تحل لازم نشوفلنا حل بنتكلم على ارقام غريبة".
وأوضح: "في شيء غريب وحاجة غريبة انا مش فاهمها؛ سؤال هل دة توب الجنيه بتاعنا؟ أنا بسأل والله انما أنه يتساب هذا الفارق الكبير؛ أنا مظنش أنه عمره كان بالفرق دة؛ طيب على الأقل نصه أنت نص وأنا نص؛ عمرو أديب مبيهمدش للتعويم لأنه متعوم والجنيه متعوم".
واختتم: "لما تسأل حد هو الدولار بكام النهاردة يبقي انت بتسأل على ايه؟ أنت بتسأل على السوق اللي عامل البضايع والعربيات والمنتجات".
