عمرو أديب تعليقا على ارتفاع الدولار: "أي حد في السوق أقوى من الحكومة"
عبر الإعلامي عمرو أديب على الزيادة غير الطبيعية في سعر الدولار الأمريكي في السوق السوداء مشيرا إلى أن هناك حالة ركود تشهدها الأسواق وهو ما يعني عدم وجود اقبال على الاستيراد.
وقال أديب خلال برنامج "الحكاية" المذاع على قناة "أم بي سي مصر": "الدولار شادد ليه وفي ركود والشراء نزل؛ كل الناس قللت في كل حاجة ومع ذلك يرتفع الدولار وترتفع الأسعار؛ من أسبوعين تلاتة لما كان في السوق السوداء 37-38 ولما كان يكسر الأربعين كانوا يقولوا يالهوي والسوق المصري من أبو لمس أول ما يغلى يقول زود اللحمة والبيض".
وأضاف: "مين اللي بيسحب الدولار؟ وتسأل يقولك مش لاقي وبيقولك اللي معاه دولار مش عايز ينزله دلوقت وفي مجموعة كدة بتاعة انهيار السوق السودة وانهيار الدولار؛ أنت كنت مبتدي من 37 وأعلى حاجة 40 ولو نزل النهاردة إلى 42 ميبقاش انهار؛ هل الدولار هيزيد تاني معرفش هل هيقل تاني؟ معرفش بس الأكادة أنه لن ينهار أنه يرجع إلى التلاتينات خلاص".
وتابع: "أنا ملاحظ حاجة أنه لا مفيش حد في البنك المركزي ولا الحكومة بيتصدى لهذا الامر ايه يا جماعة محدش بيتكلم عن الموضوع هل أنتوا سايبينه كدة عشان نشوف توبه ايه؟ احنا متأكدين أن الزيادات ليست حقيقة أنتوا بتزودوا عمال على بطال أسأل أي ست امبارح السكر كان بكام؟ والسكر دة لغز أحنا اللي بنزرع القصب والبنجر وكمان يقولك مفيش".
وواصل: "السوق فيه قوة شرائية والست كانت تمشي تجيب حاجة الشهر كلها دلوقت بقى أسبوع بأسبوع ومبقاش هات من دة تلاتة أو أربعة؛ مين اللي بيسحب الدولارات من السوق في شيء غير مفهوم بصرف النظر سعره كام وهيرجع يبقي كام وعن تقرير بلومبرج وفيتش أنا جاي من حته كان فيها توقع لسعر الدولار لما يتنيل كان 22جنيه".
وأوضح: "انا محترم الازمات والأسباب وأنا من الناس اللي دائما أقول نتحمل؛ أنا عايز أفهم أيه اللي بيجرا واضح أن أي حد في السوق أقوى من الحكومة الرقم اللي أنت واصله النهاردة دة وبعدين أنا مش عايز أقولك بيقولوا ايه".
واختتم: "يا جماعة ياللي في الوزارة ياجماعة ياللي في البنك المركزي؛ عارف لو في مبرر؟ لا حد عايزه ولا بيشتري ولا يستورد والدولة وقفت المشاريع بتاعتها ولما يحصل دة كله ألاقيه بيزيد".
