تامر أمين: "الغرب أنشأ إسرائيل لـ3 أهداف والعرب يخدوا نوبل في الغباء"
أكد الإعلامي تامر أمين، أن الدول الاستعمارية الكبرى أنشأت إسرائيل من أجل ثلاثة أهداف أهمها الحفاظ على مصالحها في المنطقة.
وقال أمين خلال برنامج "آخر النهار" "المذاع على قناة "النهار": "كان زمان جدتي بتقولي مثل كنت فاهم أنه صح لحد ما كبرت؛ المثل الشعبي المصري القديم بيقول الكدب ملوش رجلين وطول ما كنت صغير كنت مصدق أن الصدق منجي بس لما كبرت ودخلت عالم السياسة اكتشفت أن الأمثال الشعبية تنفع على الطبلية بس ولكن في السياسة الكدب ليه رجلين وليه واقع علينا أننا نتعامل معاه".
وأضاف: "اكتشفت إن احنا أساسا عايشين في كدبة كبيرة أوي اسمها إسرائيل من سنة 1916 وتحديدا من قبلها في 1898 لما هرتزل قالك عايزين نعمل وطن قومي لليهود؛ فكرة وطن قومي لليهود يعني أننا أمام فكرة دينية والحقيقة أن لا هرتزل ولا اللي جه بعده وصولا إلى نتنياهو لهم علاقة بالعمل الديني اليهودي التوراتي؛ دا عمل سياسي صهيوني بامتياز".
وتابع: "الفكرة دي تلقفتها دول الاستعمار اللي كانوا بيستعمروا نص الأرض؛ نص الأرض انجليزي وفرنساوي وقالك فرصة ما تيجي نعمل وطن قومي لليهود نضرب بيها كذا عصفور بحجر واحد؛ أولها نخلص من صداع اليهود في أوروبا ونشحنهم للشرق الأوسط".
وواصل: "اتنين نضمن أن المنطقة تفضل متفتتة وعايشة في صراعات وتناحر طول الوقت لأن المنطقة منطقة كنوز وصراعات لو وقفت على حيلها تاكلنا؛ وتالت حاجة أن يكون لنا رأس حربة في المنطقة أو عميل لها في المنطقة".
وأوضح: "قالك حلوة الكذبة تعالي نعملها ونكبرها ونعملها واقع؛ واتعملت واقع بختم الأمم المتحدة اللي كان اسمها عصبة الأمم وبقت حاجة اسمها إسرائيل وكنا زمان بنقول مسير الكدبة تتعرف والصدق يمحو الكدبة ولكن فوجئنا أن الصدق يزول والكدب بيكبر".
وأكمل: "دلوقت مبقيناش نتكلم دلوقت عن إسرائيل موجودة والا مش موجودة بنتكلم عن أن العرب ممكن يكونوا موجودين أو لا والخوف من إسرائيل الكبرى اللي هتلتهم الأراضي العربية؛ إسرائيل الكبرى من النيل للفرات".
واختتم: "شوفتوا الكدبة ابتدت ازاي وواصلة لحد فين؟ كل دة مش عشان الكدب صح ولكن عشان احنا وحشين واحنا اللي فينا العبر؛ القاعدة والقناة الصهيونية طول الوقت أن نجاحك لا يعتمد على قوتك ولكن على فشل وغباء الآخرين واحنا في الفشل والغباء حاجة تفرح ناخد نوبل".
