عمرو أديب: إسرائيل خلصت الذخيرة على قطاع غزة

عبر الإعلامي عمرو أديب؛ عن غضبه جراء العدوان الإسرائيلي الوحشي المستمر على قطاع غزة منذ 35 يوم وسط صمت دولي ودعم للجرائم التي يرتكبها الاحتلال.

وقال أديب خلال برنامج "الحكاية" المذاع على قناة "أم بي سي مصر": "مفيش حد يعرف يكلمهم محدش يرفع السماعة على الحيوان بتاع إسرائيل دة محدش يقدر يقوله كفاية؟ المسؤولية بكرة على القمة العربية الطارئة".

وأضاف: "وصلنا الـ 10 ألاف شهيد وهنوصل 20 ألف وهما قالوا الحرب هتستمر سنة؛ هو احنا عملنا حاجة غلط في حياتنا في جريمة صنعاها في هذه المنطقة؟ إسرائيل بتقول أنا الذخيرة بتاعتي خلصت أنا خلصت فيهم كل الذخيرة اللي عندي".

وتابع: "الراجل بتاع أوكرانيا بيقولهم الذخيرة قالوله مفيش الذخيرة بنبعتها لحبيب القلب؛ لا أستطيع أن أدعى أني كنت موجود وقت الحرب العالمية التانية ولكن ما يحدث الان بعد تطور البشرية وحقوق الانسان". 

وأكمل: "امبارح وأول أمبارح كانت في وفود من حماس في مصر وقابلوا المسؤولين المصريين وكان عندنا أيضا أمير قطر؛ الغريب أنه لو قلتلي من سنتين تلاتة أن مصر وقطر سيتعاونا في أي شيء مكنتش أصدق؛ اغلب الأطراف بتقبل بالوساطة المصرية القطرية".

وذكر: "الكلام كله على هدنة؛ على أنه نصل إلى هدنة وطبعا الإسرائيليين بالنسبالهم أكبر هدنة 4 ساعات في مكان بعينه وكلمة وقف إطلاق النار دي مش جاية معاهم؛ الهدنة دي لغاية لما تسيب المكان اللي أنت فيه واضربك تاني".

وواصل: "النهاردة قالوا خبر نكتة؛ دخلوا بيت أخو السنوار ولقوا فيه سلاح؛ أنتوا متوقعين تلاقوا شكولاتة؟ هما دلوقت بيعملوا إبادة ونتنياهو يعلم تماما أنه لو لم يقضي على حماس فقضائه هو فيها؛ واضح أن الخطة موجودة أن يتم استنزاف المقاومة في قطاع غزة والقضاء عليها في أي مدة زمنية وتصرف زي ما تصرف".

ويشن الاحتلال الإسرائيلي حربا غير مسبوقة على قطاع غزة؛ حيث قتل القصف المستمر ما يزيد عن 11 ألف فلسطيني من سكان قطاع غزة أغلبهم من النساء والأطفال.

ودمر الاحتلال الإسرائيلي شمال قطاع غزة بشكل كامل؛ وتشير المصادر إلى تدمير 40 ألف وحدة سكنية في القطاع.

ويسعى الاحتلال الإسرائيلي إلى دفع السكان الفلسطينيين من سكان منازلهم للهجرة نحو الجنوب في اتجاه الحدود المصرية.