عمرو يعلق على التحركات الأمريكية بشأن مستقبل قطاع غزة بعد الحرب
علق الإعلامي عمرو أديب على التحركات الأمريكية في المنطقة لإعداد خطط لوضع قطاع غزة بعد انتهاء الحرب على القطاع.
وقال أديب خلال برنامج "الحكاية" المذاع على قناة "أم بي سي مصر": "يتم الإعداد لمن يدير غزة؛ النهاردة عدى شهر هل انتهت غزة؟ أم انهم في حالة تأكد كامل أنهم هيخلصوا على غزة تماما؛ سيبكم من العته بتاع القنبلة الذرية أنما الأمريكي ماشي بيدور على حد ياخد غزة؛ طيب وغزة اللي صامدة النهاردة دي وضعها ايه".
وأضاف: "حاجة من اتنين؛ ياهما شايفين على الأرض أن الأمور بتخلص وهذا أمر أشك فيه أو هذا ضغط على غزة وحماس أن أنا واثق أوي من نفسي؛ والنهاردة طلع التصريح الواضح من السلطة أنها لن تدخل غزة على دبابة أمريكية".
وتابع: "السلطة الفلسطينية هي التي كانت تحكم غزة؛ بلينكن طلع على تركيا عايز يكلم حد في الموضوع دة أخرجوا أنتوا وهنجيب حد تاني؛ النهاردة في جملة مهمة وابتدى يتقال جملة اسعدتني أنه يبدو لا يوجد حل عسكري لموضوع غزة ودا معناه أنه الموضوع مبيخلصش إلا إذا لو في شيء احنا مش عارفينه".
وواصل: "الحل ده ايه؟ واضح أنها حاجة سياسية طيب هتبقى عاملة ازاي؟ وفين؟ هنا أسأل حاجة هو احنا يا جماعة كعالم عربي ملناش رأي في الموضوع ده هو بلينكن والإسرائيليين هيقرروا أيه اللي يتعمل واحنا ملناش رأي هي غزة ملهاش أهل ملهاش أخوات".
وأكمل: "لازم يكون في تصور كيف تسير الأمور هذه هي أرضنا ويجب أن نتحدث؛ هو مستقبل غزة في أيد الأمريكاني دا في قبله طابور وأول الطابور ده مصر أنت هتعمل ايه هنا؟ وانا على ثقة أن المصري لن يترك هذا الأمر للعبث ده".
وأوضح: "قلتلكم احنا بنشوف هيروشيما وكمية القنابل على غزة مرتين ونص من القنبلة اللي نزلت مرة واحدة على هيروشيما؛ المشاهد مروعة؛ الأطفال والشيوخ والإصابات شيء مجنون ولا يبدو أنه هيتوقف".
واختتم: "هناك مؤامرة في العالم كله أن إسرائيل تبيد الشعب الفلسطيني؛ الصمت العالمي نتحدث عن الإدارة الأمريكية والفرنسية والبريطانية كل الطلب بلاش الافترا في القتل".
