أحمد موسى عن خطاب حسن نصر الله: "اللي إيده في النار غير قاعد ياكل فتوش"

رد الإعلامي أحمد موسى؛ على تصريحات حسن نصر الله؛ الأمين العام لحزب الله والتي تحدث خلالها عن الحرب في غزة.

وقال موسى خلال برنامج "على مسؤوليتي" المذاع على قناة "صدى البلد": "حسن نصر الله أمبارح كان عنده خطاب؛ عمل 3 كليبات كدة دعاية وكل يوم يعملوا دعاية أن حسن نصر الله يطلع يتكلم حاجات شيقة جدا يعني ولما اتفرج عليهم متصورين بحرفية كبيرة وتدي رسائل أن الناس تنتظر يوم الجمعة الساعة 3 السيد حسن نصر الله هيعلن الحرب كمقاومة".

وأضاف: "الراجل قال إنه مش هنسمح بالاعتداء على غزة ولكن الراجل طلع يبرئ نفسه وقال ملناش علاقة باحداث 7 أكتوبر ودة قرار داخلي وشان داخلي؛ هايل يبرأ نفسه أحنا مالنا بالحرب ودة كلام الأمين العام لحزب الله أمبارح".

وتابع: "كنت انا قبلها بيوم كتبت على صفحتي كدة تتوقعوا أيه من خطاب حسن نصر الله بكرة؛ كل اللي دخل عندي 99% منهم قالولي اللي حصل أمبارح؛ توقعوا اللي حصل وفي ناس قارئة جيدة وناس مذاكرة وناس عارفة المواقف اللي قالك لا ولا شيء ولا حاجة هتحصل".

وأوضح: "طلع اتكلم وخلاص؛ ويجي يقولك هم واللجان بتاعتهم؛ الجيش المصري؛ الجيش المصري بيحمي أرضه وبلده وشعبه ودي مسؤولية القوات المسلحة المصرية ولازم نبقى واخدين بالنا".

وأكمل: "المخاوف كانت واضحة والامريكان حاملة الطائرات أيزنهاور وقالك مقاتلات أف 35 جاهزة والكروز والتوماهوك جاهزين وكله جاهز؛ وطلع نتنياهو رد على حسن نصر الله وقاله أوعى تفكر عشان لو حصل هيبقي في مشكلة في لبنان".

وواصل: "الجيش اللبناني هو صاحب قرار الحرب والسلام؛ لبنان مش متحملة أصلا وعندها أزمات كبيرة؛ اتقتل من حزب الله لحد النهاردة 54 واحد من غير اشتباكات؛ محصلش وحسن نصر الله امبارح قالك أنا مجهز لحاملات الطائرات دي أني هدمرهم؛ طبعا أنتوا عارفين كل حاملة لها حماية شكلها اية".

واختتتم: "طبعا الكلام دايما بيبقي سهل هو الكلام عليه جمارك محدش بيدفع جمارك والناس تتكلم اللي ايده في النار غير اللي ايده في البحر وتقعد تاكل فتوش كدة وظبط وسيبك ياعم؛ مفيش شعوب تدفع جيوشها للحروب".