وزير الصحة: "مين بيقدم حاجة في العالم للفلسطينيين غير مصر؟"

أكد الدكتور خالد عبد الغفار؛ أنه لا مجال للمزايدة على الدور المصري تجاه الاشقاء الفلسطينيين مشيرا إلى أن مصر هي الدولة الوحيدة التي تقدم شيء حاليا للشعب الفلسطيني.

وقال عبد الغفار خلال برنامج "على مسؤوليتي" المذاع على قناة "صدى البلد": "اللي بيقول مصر مقصرة؛ مين بيعمل حاجة في العالم للموضوع ده غير مصر؛ فكرني مين بيعمل ايه بيتكلموا بيشجبوا ويبعت شوية أدوية لو أمكن في طيارة؛ احنا شغالين ليل نهار ونستقبل جرحي يكفي بس أننا بنشوف مشاهد مهما وصفت لك اللي بنشوفه في التلفزيون حاجة ولما بتتكلم مع الاسر حاجة تانية".

وأضاف: "مين اللي بيتكلم على مصر ودور مصر مين دول؟ الظروف الاقتصادية في مصر صعبة جدا ولكن توجيهات الرئيس بما يخص الشعب الفلسطيني؛ بننقل أجهزة متطورة جدا من مخازننا في مستشفيات العريش؛ اسمع من الفلسطينيين واحنا بنتكلم معاهم عن اللي بتعمله مصر محدش يقدر يزايد على دور مصر".

وتابع: "التاريخ اثبت عبر القضية من الاربعينات أن الكلام سهل وجميل وأن المساعدات اللي بتبقى من برة ومن بعيد وكل واحد حياته ماشية عادية؛ احنا حياتنا مش ماشية عادي كل قيادات القطاع الطبي في مصر موجودة في العريش ليل نهار والمحافظة شغالة؛ احنا موجودين على المعبر بنتنشق عشان حالة تدخل".

وأوضح: "أحنا قاعدين وفاتحين الباب مبنمشيش؛ هناك 40 – 50 حالة يوميا تدخل إلى مصر؛ واللي شفناه في مستشفيات بئر العبد أو العريش أو معهد ناصر من مرضى الأورام حاجة تخليك متقدرش تصدق؛ طفلة عمرها 6 سنوات وكلها محروقة؛ نسبة الحروق 70% أنا شفت أطفال عندهم فقد للساقين كانوا بيلعبوا قدام البيت وشوف شظايا داخل المخ اثرت على الحركة".

وأكمل: "ثلثي الموجودين عندنا من الأطفال والشباب؛ بالإضافة للإصابات في هناك من فقدوا اهاليهم بالكامل؛ العلاج محتاج تجهيزات كبيرة واحنا كنا مستعدين ومحتاجة أطباء مهرة وبيشتغلوا ساعات في غرف العمليات؛ اللي فقد نص جسمه واللي عنده حروق أنت بتتكلم عن أثار لا يمكن تتخيلها".

واختتم: "احنا شغالين وبنعمل اقصى جهدنا عشان نخفف من الألآم؛ واحنا موجودين النهاردة كان في طبيب من اللي شاف الحالات؛ الجروح كلها مغطاة ولكن في طبيب قالي أرجوك نبعت لجنة من الطب الشرعي والمتخصصين في هذه النوعية من الجروح اللي ممكن تكون ناتجة من استخدام المواد الكيماوية الحارقة".