عمرو أديب يرد على تصريحات حمدين صباحي بشأن دعم مصر لقطاع غزة
علق الإعلامي عمرو أديب؛ على تصريحات السياسي حمدين صباحي والتي حيث فيها القوات المسلحة على حماية المساعدات الإنسانية التي تعبر من معبر رفع إلى قطاع غزة.
وقال أديب خلال برنامج "الحكاية" المذاع على قناة "ام بي سي مصر": "حمدين صباحي كان بيتكلم عن مطالب للحركة المدنية ونحن لا نزايد على حمدين ولكن في أشياء كل ما أسمعها أبقى عايز أعرف ازاي".
وأضاف: "لما يتقال لازم على الجيش المصري تأمين المساعدات إلى معبر رفح؛ ولكن كيف إيه الآلية؟ إيه هو المشهد يا شاحنة نمرة عشرة أدخلي طيب وبعدين؟ الشاحنات بتعمل لفة كبيرة وتفتيش كبير".
وتابع: "أنت شايف أن الشاحنة تدخل في حراسة الدبابات أو نجيب قوات صاعقة تدخل جنبها وهي بتدخل؛ طيب إزاي؟ بردو أحد السياسيين الكبار بيقولك مهو مصر لو جامدة مكانش حد يقدر يقرب؛ طيب دخلت الشاحنات وانضربت وبعدين؟".
وواصل: "الاقتراح بتاع منع سفن داعمي العدوان من قناة السويس؛ القسم الأول داعمي العدوان دول كل العالم دول كام سفينة؟ إنجليز ألمان فرنساويين وأوكران أغلب جنسيات العالم تدعم إسرائيل هتوقف ده".
وأوضح: "نمرة اتنين هو مش في اتفاقية في قناة السويس دي؟ هي ماكدونالدز هنقاطعها؛ المرة اللي فاتت لما حصلت الحكاية دي كانت حرب؛ بشويش على الناس؛ أنا معاك أن الوضع بائس مخلينا في حالة صعبة ولكن هي دي الحاجة؟ هي دي الاقتراحات؟".
وأكمل: "أنا قاعد مستني بقي وريني هيطلع ايه؟ الناس عندها تصورات سينمائية للاشياء؛ أنا مش هكلمك على الداخل وانت شايف الدخل عامل ازاي؛ الناس بتاكل من قناة السويس دي الحاجة الوحيدة اللي دخلها موجود ومع ذلك فلوسها تسد مصاريف شهر؛ مصاريفك بالدولار في الشهر 9 مليار".
وذكر: "أنا قلت لحضراتكم أن واحد من اللي بثق فيهم في الموضوع الفلسطيني قال إن الوضع ممكن يفضل سنة والشهداء يصلوا إلى 20 ألف؛ أنت لو جار حضرتك قعد سنة الشقة مولعة كل يوم أنت واهلك هتحسوا بعدم الأمان دا لو حريقة في شقة انما دولة مولعة لمدة سنة وكل يوم أسوا من اللي قبليه والعالم موقفه حدث ولا حرج".
واختتم: "حاجة هتتسجل في التاريخ أن العالم كان غير انساني كان قاتلا كان متواطئنا؛ طيب احنا هنعمل ايه؟ انا لازم أوفر لنفسي كل عناصر القوة والصمود والاستمرار".
