أحمد موسى عن تخفيف أحمال الكهرباء: "كده أو هيبقى مفيش خالص"
أكد الإعلامي أحمد موسى، أن تخفيف أحمال الكهرباء يأتي للحفاظ على استمرارية وجود الطاقة في البلاد.
وقال موسى خلال برنامج "على مسؤوليتي" المذاع على قناة "صدى البلد": "بقالنا كام سنة بندفع تمن تطورات مش بتاعتنا؛ ولكن بتأثر علينا تأثير مباشر من كورونا للحرب الروسية الأوكرانية للعدوان الصهيوني على غزة".
وأضاف: "اليومين اللي فاتوا اتأثرنا شوية بالكهربا لقيت رسائل بتجيلي من المواطنين المحترمين الحقنا الكهرباء بتقطع علينا؛ يوم الجمعة لقيت مواطن واقف على الطريق مش لاقي مواصلات فوقفت وركب جنبي قولتله بتشتغل فين قالي في محطة كهرباء الزعفرانة وبقوله أيه أخبار الكهربا قالي عندنا مشكلة".
وتابع: "المحطة دي بتشتغل بالرياح ولازم يكون في هو ولما يكون عندنا رياح شديدة بيبقي عندنا إنتاج ومعندناش رياح دلوقت؛ وإذ فعلا عندنا مشكلة في الإنتاج؛ مشكلة كمان العدوان الإسرائيلي على غزة؛ كان بيجيلنا 800 مليون قدم مكعب غاز بتيجي محطات الإسالة بنعمل تسييل ونصدر والنهاردة بقت الحصيلة صفر لا في 800 ولا مليون ولا ربع متر مكعب غاز واتاثرنا".
وواصل: "بقي عندنا مشكلة حقيقة في مسألة تخفيف الاحمال أنت مضطر كدولة أيوة مضطر؛ أما أخفف احمال ساعة أو ساعتين أو تجيلك الكهرباء وبعد فترة لا يبقى عندي كهربا ولا طاقة؛ ومعندكش بديل تاني".
وأوضح: "البديل المتاح دلوقت في ظل تحديات أننا بندفع تمن العدوان على شعبنا في فلسطين؛ لحد يوم الخميس كان عندنا تخفيف أحمال بالضبط 1600 ميجا اللي هو كان ساعة في اليوم ويوم الجمعة اللي فاتت بدأنا نخفف ساعة ونص في اليوم".
وأكمل: "اعتبارا من امبارح بدأنا ساعتين؛ التخفيف كان من 1600 ميجا إلى 3000 ميجا وات النهاردة وامبارح وبكرة وبعده؛ شهر سبعة وتمانية وصلنا إلى 3200 -3500 ميجاوات في اليوم".
وذكر: "لو أنا في إسكندرية كانت الكهربا بتتقطع عندي من الساعة 12 إلى الساعة 1 النهادرة هتتقطع من 11 إلى 1 بقوا ساعتين مش هيبقوا تلاتة وهيبقوا مرة واحدة لو في تكرار يبقي في مشكلة عندك بلغ على طول".
واختتم: "أقولكم حكاية مهمة؛ أحنا كدولة غير دول العالم؛ العالم الاستهلاك الأكبر ايه هو؟ المصانع القطاع الصناعي طيب احنا في مصر الاستهلاك الأكبر ايه؟ المنزلي؛ احنا بنصل إلى 46% من حجم استهلاكنا من الغاز بيوت والصناعة 25%".
