أحمد موسى: الغرب شريك للإرهاب الذي استهدف مصر
هاجم الإعلامي أحمد موسى؛ الدول الغربية بسبب موقفها من القضية الفلسطينية، مشيرا إلى أنهم منافقون وأنهم يغضون الطرف عن جرائم إسرائيل.
وقال موسى خلال برنامج "على مسؤوليتي" المذاع على قناة "صدى البلد": "الغرب المنافق وإحنا بنحارب الإرهاب 11 سنة والغرب يقولك خلي بالك المدنيين؛ كانوا بيقولوا كدة والنهاردة آلاف المدنيين في غزة بيتقتلوا والغرب موافق وسعيد".
وأضاف: "لما بتاخد سلاح بيقولك خلي بالك أدي شروط استخدام السلاح؛ طيب هو السلاح اللي واخداه إسرائيل وتستخدم القنابل والفسفور الأبيض المحرم دوليا؛ الامريكان يقولك والله معندناش دليل؛ أنت عايز دليل أيه بعد الناس اللي بتضرب دي والمصابين كلها محروقة؛ بفسفور أبيض محرم والأمريكان سعداء ومبسوطين".
وتابع: "هذا هو العالم الغربي المنافق اللي خطابه عمره ما كان واحد؛ احنا واجهنا أرهاب وانتصرنا ومطلبناش دعم من حد؛ في وقت من الأوقات قالوا ممكن نساعدكم قلنا متشكرين؛ عندنا القدرة والرجال وحققنا الانتصارات بالحرب على التنظيمات الإرهابية".
وواصل: "بيتكلموا النهاردة على حركة حماس؛ أصلا حماس موجودة في أمريكا وبريطانيا وفرنسا؛ التنظيم الدولي موجود في فرنسا؛ أنت جاي تتكلم على حماس وتقولي إنها حركة إرهابية؟ مانت عندك التنظيم كله عندك ولما قلنالهم قالوا دي جماعة بتاعة دعوة".
وأوضح: "قعدنا نقولهم سنوات طويلة دول إرهابيين قالوا لا مش إرهابيين؛ النهاردة مسؤول وزارة الخزانة الأمريكية راح لندن عشان يتابع ملف تمويل حماس في لندن؛ انت عندك الأصل وتحت ايدك الورق والمستندات؛ أنت عندك في أمريكا وانا نشرت علاقة منظمات موجودة في أمريكا منظمات اخوانية ونشرت الوثائق بتاعتها؛ انت عندك الحكاية كلها أنت جاي النهاردة تبيع للعالم أنكم بتواجهوا الإرهاب؟ أنتوا دعمتوا الإرهاب".
وأكمل: "الدول دي كانت سبب رئيسي في دعم الإرهاب في مصر؛ الغرب كان مسؤولا عن الإرهاب اللي حصل في مصر ودعم الإرهاب اللي حصل في مصر من لندن وفرنسا وأمريكا وألمانيا".
واختتم: “أنت شريك للارهاب اللي حصل للبلد وشريك للارهاب اللي ضرب سياح عندي وأثر على اقتصاد مصر؛ إرهابيين في لندن بيخدوا فلوس ومرتب؛ بيديلوا دعم إعادة اجتماعية وإقامة؛ دا إرهابي محكوم عليه بالاعدام وانت بتستضيفه في لندن وأمريكا هذا هو النفاق الغربي جاي النهاردة يقولك حركة حماس”.
