أحمد موسى يهاجم الأمريكان: "شركاء في إبادة الشعب الفلسطيني"
أكد الإعلامي أحمد موسى؛ أن الولايات المتحدة تعطل أي إجراءات في مجلس الأمن الدولي من أجل ادخال المساعدات الإنسانية إلى قطاع غزة.
وقال موسى خلال برنامج "على مسؤوليتي" المذاع على قناة "صدى البلد": "أمريكا تعطل أي إجراءات في مجلس الأمن وتعطل أي إجراءات تتعطل بإدخال المساعدات؛ أمريكا عايزة تخرج المواطنين بتوعها وتسيب الشعب الفلسطيني يتقتل".
وأضاف: "أنت عايز تخرج الرعايا بتوعك اللي جوه غزة وخايف عليهم وأنت شايف الدمار والقتل للشعب الفلسطيني؛ يعني هما دول بشر ودول مش بشر؟ دول مش انسان ولهم حقوق؟ وأنت كعالم غربي امريكي والا أوروبي عايزين تخرجوا رعاياكم من عندنا من المعبر بتاعنا ومندخلش المساعدات حتى الناس تاكل".
وتابع: "أمبارح باليل طلبوا اخلاء مستشفيات في قطاع غزة خلال ساعتين عشان هيتم قصفها وقصفوها؛ أدى الشهداء الفلسطينيين والضحايا مش عارفين يدفنوهم؛ دول أمبارح باليل مش عارفين يدفنوهم حطوهم قدام مستشفى نتيجة العدوان الهمجي الصهيوني".
وأكمل: "أدى دلوقت جيش الاحتلال يدعو سكان شمال غزة للتوجه إلى الجنوب؛ هيقتل الشعب الفلسطيني كله وأمريكا شريكة وانا بوجه الاتهام لأمريكا على الهوا؛ شركاء في القتل والابادة؛ أدى شهداء الشعب الفلسطيني بالدعم الأمريكي غير المسبوق والدعم البريطاني غير المسبوق والفرنسي غير المسبوق لابادة الشعب الفلسطيني".
وأوضح: "هتقتل الشعب بالكامل؟ هيجي أجيال وأجيال وهيجي اليوم اللي يحرروا أرضهم وهيكون ليهم دولة أيا كانت السنين فين جو باين اللي بيتكلم عن الناس شوفوا الدمار في غزة شوفوا شعب فلسطين اللي بيتم ابادته بمشاركة أمريكية بريطانية ودعم أوروبي كامل".
وواصل: "كله واقف هي حقوق الناس دي فين؟ فين الرئيس الأمريكي اللي طلع كذب على العالم وقالك قطعوا الرؤوس واغتصبوا الناس ومراسلة السي أن أن اعتذرت وقالت آسفة أنت طالع تكذب على العالم عشان تبرر العدوان".
واختتم: "نخلي بالنا كويس أوي مع بلدنا ونقف وقفة كبيرة؛ مينفعش النهاردة تاخد قرار؛ أنت عايزني أعمل ايه أنا؟ أنت عايزني أعمل ايه أنت كنت بتشتم الجيش المصري وعايز تفكك الجيش وجاي النهاردة تقول الجيش المصري فين؟ الجيش موجود يدافع عن بلده".
