عاجل| هل يحقق تعويم الجنيه مجددا فائدة للاقتصاد المصري؟

أكد الإعلامي محمد علي خير؛ أن تعويم الجنيه المصري مجددا لن يعود بالفائدة على الاقتصاد المصري على الإطلاق.

وقال خير خلال برنامج "المصري أفندي" المذاع على قناة "المحور": "عايز أكلمكم كلام في الاقتصاد؛ في الست شهور اللي فاتوا لقينا محللين اقتصاديين ووسائل اعلام تتحدث عن تعويم الجنيه المصري مقابل الدولار والكلام بيقولوا خلال أيام والكلام دة من ست شهور وفات الست شهور رغم أن في مؤسسات دولية قالت دة".

أضاف: "الست شهور فاتوا ومحصلش تعويم؛ والحوار الدائر أن في تعويم بعد الانتخابات الرئاسية وأن الدولة المصرية هتروح للتعويم لا مفر؛ النهاردة الرئيس التنفيذي لصندوق النقد الدولي تطالب مصر وبتقول بالنص مصر سوف تستنزف احتياطاتها الثمينة ما لم تخفض قيمة العملة مرة أخرى".

وتابع: "لو كانت الأزمة أزمة تعويم واقتصادنا هيبقي زي الفل يلا بينا بكرة نعوم الجنيه ونخليه بخمسين ستين ونقضي على السوق السوداء والبنك المركزي ينزل الدولار بس دا لن يحدث مهما عومت لن يحدث؛ لو الدولار بكرة بأربعين هتلاقيه في السوق السوداء بـ45 جنيه وفي الخليج بـ55 جنيه".

وواصل: "في اكتر مما جرى في لبنان؟ الدولار في لبنان قرابة الـ 100 ألف ليرة؛ السنة اللي فاتت كان بـ 32 ألف والنهاردة بـ 90 ألف هل الأمور الاقتصادية بقت زي الفل؟ الإجابة لا دا اسمه اصلاح نقدي اللي هو نلعب في العملة؛ إذا مكانش التعويم يتم في إطار منظومة اقتصادية كاملة يبقي الدولة اللي هتعوم هتلبس في الحيطة".

وأوضح: "أنت عايز تخلينا نعوم رابع وتقول مش كفاية؟ لا طبعا دا خراب على الدولة والمواطن واتفق مع ما قاله الرئيس السيسي في يونيو الماضي لما قال لا طبعا العبء هيبقي على المواطن".

وأكمل: "السادة المسؤولين عارفين كل حاجة ومش هندفن راسنا في الرمل؛ في ظل الأزمة الاقتصادية اللي بتعاني منها الدولة المصرية هل ينفع ميبقاش عندي وزير اقتصاد أو وزير استثمار؟ دا مينفعش".

واختتم: "في وثيقة ملكية الدولة؛ اللي هي في مؤسسات حكومية تنافس القطاع الخاص في البزنس بتاعه وكل المطالبات أن المؤسسات دي ترجع مينفعش وينبغى تخارج مؤسسات الدولة من مزاحمة القطاع الخاص".