عمرو أديب: أطالب باسم الناس بحرية الكلام في الإعلام دون خوف

وجه الإعلامي عمرو أديب عدة رسائل إلى الرئيس عبد الفتاح السيسي بشأن التناول الإعلامي للقضايا الوطنية.

وقال أديب خلال برنامج "الحكاية" المذاع على قناة "أم بي سي مصر": "إحنا كنا بنرد على الناس اللي كانت بتحط نمر تليفونات الظباط عشان يغتالوهم باليل؛ سيادة الرئيس أنا قابلت حضرتك وأنت رئيس للمخابرات الحربية من اليوم ده حضرتك عارف كمية الحروب اللي البلد اتعرضت لها هو حضرتك ناسي اللي اتقال ان ده مش عبد الفتاح السيسي وأن ده واحد شبهه؟".

وأضاف: "إحنا بنتكلم عن 20 توك شو من الساعة 7-8 باليل إلى الساعة واحدة الصبح؛ أمريكا كدة وبريطانيا كدة عدد من البرامج ووجهات النظر؛ أنت قلتلنا أن خلاص بقينا مستقرين وبفضلك وبفضل القوات المسلحة استطعنا تجاوز الأمر".

وتابع: "احنا عايزين نخدم بلدنا وندي للبلد دي كل شيء البلد دي فيها ناس غير الناس؛ الانسان المميز أو اللي عنده فكر جديد عمره ما كان العادي؛ دايما مختلف وبيقول حاجات مختلفة".

وواصل: "سيادة الرئيس حضرتك لما بتتكلم زي ما اتكلمت الأيام اللي فاتت الأجزاء اللي بتشعر أنها مهمة للناس هي الأشياء اللي فيها مصارحة وجدل؛ أنا عندي جمهور بيسأل كل يوم طيب هتعرف بقي تتكلم في النقطة دي؟ بيبقي الصراع بيني وبين فريق الاعداد بتاعي اللي هو شايفيني مجنون أنت هتتكلم في ايه".

وأوضح: "أنا عايز اخدم بلدي والسنة الأخيرة اللي اشتغلها في الاعلام دي اشتغلها واخدم بلدي؛ خلي سيادة الرئيس كل الأصوات تتكلم هو حصل ايه يعني؟".

وأكمل: "مثال الفترة الأخيرة في ناس بتطلع فيما يسمى المنصات حصل ايه في البلد؟ لسا أحد السياسيين المرموقين طالع يتكلم خلي حد يرد عليه؛ اخر حاجة الحوار الوطني وللي قاعد في الحوار الوطني مين أسياخ ناس كلامها حاد جدا".

وذكر: "اللي الناس متعرفوش أن اغلب الحوار الوطني كان متذاع على الهواء والناس بتتكلم؛ هذا البلد يستحق الكلام زي ما حضرتك بتتكلم تقول للناس الحقيقة والواقع حتى لو كان صادم".

واختتم: "ارجو الست سنوات القادمة نبدأها بقدرة كبيرة على الاحتواء؛ البلد دي يا هي هشة أوي أي حد يتكلم باليل يهدها وبتبان الحقائق كل شوية أنه عندما تم هدم هذا الوطن كان في حاجات كتير؛ احنا بننضرب بالصواريخ بقالنا 10 سنين باليل وفلوس بتندفع جامد حصل ايه؟".