عمرو أديب يعلق على أزمة التوكيلات: "في ناس بتحب تخدم"

علق الإعلامي عمرو أديب، على أزمة تحرير التوكيلات الخاصة بمرشحي رئاسة الجمهورية المحتملين والتي شكى منها البعض خلال الأيام الماضية.

وقال أديب خلال برنامج "الحكاية" المذاع على قناة "أم بي سي مصر": "ناس مرشحة نفسها؛ ناس تاخد تزكيات وناس تاخد توكيلات؛ أرجوكم بقي خلاص لأن كده مش حلو؛ لأسباب تاريخية تراثية الناس تصدق دايما السيء أن الراجل راح يعمل ومقدرش؛ وهيقولك لو كان قدر كان قالك ليه ميقدرش؟".

وأضاف: "أنا عايز بكرة نشوف صور أنت واخد الناس اللي عايزة تعمل التوكيلات من إيدهم؛ اتفضل يا باشا كوباية الشاي واعمل توكيلك للي أنت عايزه؛ دي مصر ومصر كبيرة وعظيمة؛ النهاردة الهيئة اشتبكت وقالت في ناس بتتكلم وتقول كذا كذا ولو سمحتوا نعمل كذا".

وتابع: "في ناس بتحب تجود وتخدم؛ الموضوع مش محتاج؛ أنا بتكلم بصدق وبحب؛ الموضوع مش محتاج خلو الناس تعمل التوكيلات؛ مش اختراع دول 25 ألف توكيل من 15 محافظة".

وأوضح: "اللي أنا بقوله ده هو كلام الدولة، قالت أنا جالي شكاوى وفعلا احنا رصدنا أن الأجهزة بتروح وفي ناس بتروح يقولولهم السيستم واقع؛ لما بتروح تعمل أي حاجة في الشهر العقاري يقولك السيستم واقع".

وواصل: "الهيئة العليا للانتخابات قالتلك لو في عدد كبير مدوا الوقت؛ يا ريت ننفذ الكلام ده أعملوا التوكيلات وأخلصوا وبعد كدة زي ما الرئيس قال دعوا الملك للمالك وربنا يولي اللي فيه الخير؛ انتوا عايزين سين أو صاد أو عين أو لام اللي انت عايزة بس أدى الفرصة أن كل الناس تقدر تبقى موجودة وتتكلم".

وذكر: "اللي بيجرا ايه الناس بتيجي تعمل التوكيلات فتبقى في صعوبات ويقفوا يعملوا مظاهرات؛ طيب واحنا علينا بايه؟ أنا رايح أعمل توكيل مش رايح أعمل مظاهرة".

وكان المرشح المحتمل أحمد الطنطاوي قد شكي من تعطيل بعض مكاتب الشهر العقاري لمناصريه ومنعهم من تحرير التوكيلات الخاصة به.

كما شكا المتحدث باسم الحملة الانتخابية للمرشحة المحتملة عن حزب الدستور جميلة إسماعيل من نفس المشكلة أيضا.