أحمد موسى: "الرئيس قلبه جامد ومش خايف على المنصب"
أشاد الإعلامي أحمد موسى؛ بتصريحات الرئيس عبد الفتاح السيسي خلال مؤتمر حكاية وطن والذي شرح خلالها الأوضاع الاقتصادية للبلاد.
وقال موسى خلال برنامج "على مسؤوليتي" المذاع على قناة "صدى البلد": "الرئيس بيقول لحضراتكم لو أنا بتكلم سياسة وانتخابات الرئيس مكانش هيتكلم كدة نهائي؛ في انتخابات بعد شهرين الرئيس كان لازم يظبط ويقول أصل وأه والحكاية ولو خايف على منصب رئيس الجمهورية لا يمكن يقول كلمة من اللي قالها".
وأضاف: "الرئيس بيتكلم بقلب جامد جدا مش كلام رئيس أن بعد شهرين بيقول لو سمحتم أنا داخل انتخابات؛ كان هيبقي كلامه سياسة ودعاية انتخابية؛ الرئيس النهاردة مبيعملش دعاية انتخابية الرئيس بيقول مشاكل الدولة؛ خوفه على البلد مش خوفه على الكرسي خالص؛ والله لو يعنيه الكرسي مكانش هيقول ولا كلمة من اللي قالها".
وتابع: "الرئيس بيقول أه الكهربا ممكن متقطعش تاني وممكن نحلها دلوقت ولكن عندي 300 مليون دولار بيجولي كل شهر عشان أجيب البنزين والسولار؛ طيب انا معنديش ونقدر نخفف شوية عشان نجيب شوية دولار نجيب بيهم سولار وبنزين؛ دا كلام رئيس رايح انتخابات أو بيفكر يروح انتخابات؟ أه بس تاني اللي يعنيه هناك الاستقرار والوضوح".
وواصل: "الناس بتاخد كهربا بربع تمنها في حد بيقول كده؟ أه لأنه بيقولك حكاية مصر أنا مش جاي أجمل الصورة أنا جاي أقولكم وبالمناسبة شفافية أكتر من كدة مش موجودة؛ خوف على البلد اللي مش ممكن ابدا يحصل تاني زي ما كان".
وأوضح: "في ناس بالمناسبة من مستشارين الرئيس يزعلوا من هذا الكلام؛ مفيش حاجة عند الرئيس اسمها موائمة سياسية؛ محدش بيتكلم ولا يستطيع أن يتحدث مع الشعب بهذه الطريقة إلا الرئيس؛ لا وزير ولا حد يطلع يتكلم كده".
واختتم: "الرئيس في الاخر بيقولك ايه معايا أو مع غيري؛ بيقول للي معاه الصبر والتحمل والعمل؛ مع غيري بقي شوفوا حاجة تانية؛ الرئيس قلبه جامد جدا بصراحة ومسألة فيها صدق وشفافية مشفنهاش قبل كدة؛ بيتكلم على الوضع اللي احنا فيه؛ قال عايزيني أستلف تاني؟ عشان أعمل ايه احل موضوع الكهربا واستلف تاني؟ واحنا نتحمل ساعة في اليوم".
