الرئيس السيسي: حقل ظُهر رحمنا من قيمة استيراد الغاز من الخارج

قال الرئيس عبدالفتاح السيسي، إن حقل ظهر «رحمنا» من قيمة استيراد الغاز من الخارج. وجاء ذلك خلال الجلسة الثالثة من جلسات اليوم الأول في مؤتمر «حكاية وطن.. بين الرؤية والإنجاز» في العاصمة الإدارية الجديدة.

وأوضح الرئيس السيسي: «العوز مش مشكلة، المشكلة أنك تقبله، والمشكلة أنك متبقاش مستعد أنك تقاتل من أجل انهائه، واللي قبل منا حاولوا، وعلشان أكون أمين كانوا ناس مصريين بيحبوا بلدهم، ويمكن حجم التحدي كان كبير أوي».

وتابع: «الرئيس السادات وصل للسلام، وكان مقدر أن الحرب كان لها تأثير على الدولة المصرية حتى في ظل الدعم، لأن الدعم المطلوب كان كبير، لأنه يتم تخصيصه للدعم العسكري والاقتصادي».

وأضاف: «لابد من زيادة مواردنا، مصر عملت محاولات كثيرة لتجاوز الأزمة السكانية منذ الرئيس عبدالناصر والسادات ومبارك، وحتى الآن محققناش المعدل المطلوب، وتصوروا لو من 2011 لحد اليوم لو نمونا السكاني ثابت، والوفيات قد المواليد، من 2011 حتى الآن، عدد السكان زاد 25 مليون مواطن، وأساسًا عمر ما نسبة الوفيات اقتربت من المواليد».

واستكمل الرئيس السيسي حديثه: «خسرنا 450 مليار دولار في 2011، وكأن ملهمش تأثير، وكل أزمة هتتعمل فيك أو هتعملها هيبقى ليها تداعيات، وبقول الكلام ده مش ليا والمسؤوليين، لكن بقوله لكل إنسان مصري بسيط، الدولة بتدفع تمن الـ450 مليار دولار من لحمها الحي، وأنت كمواطن عاوز تعيش وأنا معاك، وعاوز تربي ولادك وأنا جمبك، وعاوز تشغلهم وده حقك، وهنعمل ده أزاي واحنا مش فاهمين الحكاية».

وذكر الرئيس السيسي: «عاوزين تخرجوا من الأزمة ولا نقعد نضحك على بعضنا؟!، الناس جت وقت كورونا في الوقت ده كان في 5 ملايين مصري شغالين في المشروعات، ومكنش ينفع يقعدوا».