عمرو أديب يعلق على ظهور أحمد الطنطاوي وسط أنصاره أمام الشهر العقاري
علق الإعلامي عمرو أديب؛ على ظهور المرشح المحتمل لانتخابات الرئاسة أحمد الطنطاوي وسط أنصاره أمام أحد مكاتب الشهر العقاري لتحرير التوكيلات الخاصة بالترشح للانتخابات.
وقال أديب خلال برنامج "الحكاية" المذاع على قناة "أم بي سي مصر": "خلي الناس تتكلم وتقول اللي هي عايزاه؛ في بداية الأمر في ناس تخيلت أن الدنيا هتضلم ولكن فجأة راحت منورة حالة الشك ومش هيحصل ومش هينفع انتهت نحن الآن داخلين على الانتخابات الرئاسية".
وأضاف: "مين اللي مضايق النهاردة؟ اللي كان عايزها تبقى مضلمة؛ كان عايز الراجل ده ينزل النهاردة وينضرب هو وأنصاره عشان يقولوا أدي البلد والنهاردة أكتر ناس فرحانة هما أنصار الرئيس عبد الفتاح السيسي".
وتابع: "المفاهيم التراثية المراعية في الانتخابات المصرية بتخلي الأمور صعبة شوية؛ ولكن النهاردة حصل حلحلة؛ النهاردة بقي محدش يجي يقولك أيه دانا كان ممكن أجيب مليون توكيل بس لولا؛ لا مفيش لولا".
وواصل: "عايز تترشح أنزل هات التوكيلات؛ والنهاردة أنا بشكر مش عارف مين بس اللي حصل النهاردة الصح واللي حصل النهاردة يريحك؛ هتيجي تقولي أنت مزودها شوية؛ هكون صريح أكتر؛ الانتخابات فرصة لنقل رسائل".
وأوضح: "النهاردة حصل أن الناس اللي مكانش عندها أمل خالص أن مفيش معارضة لها صوت قال طيب أيه يعني منا أنزل وأدي صوتي للمعارضة؛ أنت النهاردة كان عندك مشهد سياسي؛ تخيل لو المشهد دة كان الناس اللي نزلت النهاردة انضربت علقة واتخدت على البوكس كان هيبقي منظرنا أيه".
وذكر: "النهاردة حصل حلحلة ومفيش حد يقدر يقولك النهاردة أنا مش قادر أنا مش عارف؛ أنت كاتب دستور من 100 سنة؛ كتير في المنطقة بنوا على دستور 1923 بتاعنا؛ وانت النهاردة بعد دة كله أن تبقى مشكلة أن الراجل ينزل يعمل توكيلات؟ شرط المحبة الجسارة أنزل وريني وتحدث حتى أراك".
أوضح: "أنا عايز هذا الأمر يستمر فليتحدث الناس ويطوف الناس إلى الشوارع ويقولوا أرائهم جائز ياجماعة تبقى دي مرحلة فتح المجال السياسي؛ احنا بنتكلم عن 6 سنين جاية أنت بتسلم القيادة لمواطن مصري تحسبه أنه يبقي قادر أنه هيقوم بهذا الأمر".
وأختتم: "أنتوا لازم تروحوا وتقولوا رأيكم؛ أنت قدامت تلات اختيارات؛ ان شالله تقول مش عايز دة ولا دة؛ مينفعش بعد كدة تقول أنا مش عاجبني؛ أنت اخترت كدة وأنت عايز كدة وأرجوكم تحت أي ظرف محدش يسخر من حد".
