تامر أمين عن سعر الآيفون: "التاجر بيكسب 40 ألف جنيه في جهاز واحد"
علق الإعلامي تامر أمين؛ على ارتفاع سعر هاتف أيفون 15 برو ماكس الجديد والذي وصل قرابة الـ 100 ألف جنيه مشيرا إلى أن من يطرحونه من تجار يبالغون في سعره.
وقال أمين خلال برنامج "اخر النهار" المذاع على قناة "النهار": "كلمتكم يوم التلات اللي فات عن التليفون اللي نزل بـ 100 ألف جنيه؛ وساعتها قلت التليفون ده ندخله في شقة أو عربية؛ المليون جنيه عبارة عن 10 تليفونات؛ قلت لكم حتى اللي هيشتريه فشخرة وقنعرة كدابة؛ دا اسمه اسراف وبذخ ودا اللي حذر منه رب العالمين (إن المبذرين كانوا اخوان الشياطين) عايز تبقى أخو الشيطان روح اشتري التليفون الجديد".
وأضاف: "احنا عندنا بعض التجار مش عايز أقول مبيعرفوش ربنا؛ بس مبيراعوش ربنا في أكل عيشهم وفي الناس؛ من يومين والناس ابتدت تسأل هو الموبايل دة برة بكام؛ يعني في دبي أو السعودية فاكتشفنا إن الموبايل أحدث حاجة في بلده بـ 1400 دولار".
وتابع: "جنبنا في دبي بكام؟ بحوالي 5800 درهم؛ إيه دة؟ يعني بحسبه بسيطة؛ 1400 دولار احسبها بسعر البنك المركزي يبقي بـ43 ألف جنيه بلاش؛ طيب 1400 دولار في 40 جنيه يطلع بـ56 ألف جنيه؛ طيب اللي في دبي الدرهم 10.5 سعر غير رسمي يساوي 60 ألف جنيه".
ووصل: " 60 ألف جنيه لو ضربنا العملة في اعلى سعر؛ حد يقولي الـ 40 ألف جنيه دول بيدخلوا في جيب مين؟ يعني التاجر بيكسب أضعاف اضعاف الشركة المصنعة؟ يكسب 50% من سعره أنا مش مصدق الجشع ومص الدماء والاستغلال وصل عند بعض الناس لحد فين".
واختتم: "هو لو كسبت 10 ألاف جنيه في كل حتة وحش؟ تكسب 40 ألف جنيه؟ ليه؟ اللي بيشتري الموبايل كدة بيضر نفسه وبيضر غيره لأن السعر هيفضل عالي طالما عليه اقبال؛ وانا قاعد بقلب في بعض مراكز بيع التليفون دة عشان أعرف متوسط السعر كام لقيت معظم القطع اتباعت؛ اللي جاب 10 حته أو 30 حته باعهم بالأسعار دي؛ مش عايزينهم يضحكوا عليكم وطالما بتشتري وراضيين ينضحك عليكم خلاص".
