عمرو أديب عن جدول الانتخابات: "15 يوما هيحسموا أسماء المرشحين في الانتخابات الرئاسية"

علق الإعلامي عمرو أديب، على إعلان الهيئة الوطنية للانتخابات الجدول الزمني للانتخابات الرئاسية المقبلة والمقرر إقامتها في ديسمبر.

وقال أديب خلال برنامج "الحكاية" المذاع على قناة "أم بي سي مصر": "من 5 إلى 14 أكتوبر الناس هتقدم ورقها معني التاريخ دة ايه؟ بالنسبالي المعني الأول أن خلاله هتعرف مين اللي مرشح نفسه؛ في ناس قالت هترشح نفسها وناس مقالتش وفي ناس مستنية المفاجأة واللي هيرشح نفسه في اللحظة الأخيرة".

وأضاف: "بعد يوم 14 خلاص اللي رشح نفسه هيبقي رشح نفسه؛ جايز حد من الأسامي اللي أنت عارفها ميرشحش نفسه وجايز حد يرشح نفسه".

وتابع: "من 5 إلى 14 مهم بالنسبالي في موضوع تاني؛ هل أنت هتقدر تجيب التوكيلات ولا لأ؛ الـ 25 ألف توكيل من 15 محافظة هتقولي هو معقولة حد مش هيعرف يجيب الـ 25 ألف توكيل معرفش؛ وجايز يبقي عندك مشكلة ما؛ هتعرف مين اللي نفع يدخل ومين اللي معرفش يدخل خالص".

وواصل: "هتقولي ازاي يعني؟ معرفش؛ أنا حضرت اللواء عمر سليمان شخصيا ومعرفش يجيب الورق بتاعه؛ يوم 14 خلاص جت اللجنة وقالت احنا استلمنا الورق ودول اللي مرشحين نفسهم".

وأوضح: "يوم 14 أكتوبر ده يبقي باقيلك النص التاني من أكتوبر ونوفمبر يعني أنت عشان تبقي رئيس مصر قدامك شهر ونص يعني أنت عشان تبقي رئيس نادي هتاخد وقت أكتر؛ الكام يوم الجايين دول هتبقي شغال تعمل توكيلاتك وقدامك شهرين عشان تعمل كل حاجة".

وكانت الهيئة الوطنية للانتخابات قد عقدت مؤتمرا صحفيا اليوم أعلنت خلاله التفاصيل الخاصة بانتخابات الرئاسة والتي ستعقد في ديسمبر المقبل.

وأعلنت عدة شخصيات سياسية وأحزاب عن خوضها الانتخابات الرئاسية مثل حزب الوفد الذي قرر الدفع برئيسه عبد السند يمامة كما أعلنت جميلة إسماعيل رئيس حزب الدستور الترشح على المنصب.

كما أعلن البرلماني السابق أحمد الطنطاوي نيته الترشح بالإضافة إلى المستشار أحمد الفضالي.

ومن المقرر أن تقام الانتخابات بإشراف قضائي كامل ضمانا للنزاهة والشفافية قبل انتهاء المدة المقررة دستوريا بشأن انتهاء الإشراف القضائي.