محمد علي خير يوجه رسالة للحكومة: "إحنا متسلمين للتجار الجشعين تسليم أهالي"

طالب الإعلامي محمد علي خير؛ الحكومة بتشديد الرقابة على الأسواق ووقف استغلال التجار للمواطن المصري في ظل الأزمة الاقتصادية الحالية.

وقال خير خلال برنامج "المصري أفندي" المذاع على قناة "المحور": "تسألني النهاردة ايه المناشدة أو القضية الرئيسية الي لازم تبقي أمام أي مسؤول في بلدنا هما 3 حاجات عايزهم المواطن طول عمره أول حاجة الأكل؛ الاكل يبقي متوفر واسعاره في متناول أيدي وتاني حاجة التعليم وتالت حاجة الصحة؛ وغير كدة أنا مش عايز منك أي حاجة لا هكلمك على ديموقراطية ولا نهضة ولا تنمية".

وأضاف: "الأكل النهاردة وأسعاره بقت مرتفعة جدا وعايزة شدة جامدة من الحكومة والرقابة على الأسواق لازم تكون مستمرة على مدار الساعة ومينفعش المواطن يتساب لتجار جشعين ولو وصلنا لتحديد هامش للربح في السلعة نعمل دة".

وتابع: "فرنسا كدولة أوروبية واقتصاد حر لديها هامش في الربح ولا يستطيع أن يتجاوز أحد ربح الـ 30%؛ حاجة بتتباع برة بـ 2000 جنيه حاجة بشتريها من محل بأمريكا؛ أنا هستوردها كتاجر في مصر هناك وهدفع عليها قد ايه جمارك ضرايب عمال وكهربا هقول 2000 جنيه كمان؟ يبقي أربعة ويوم ما أبيعها المفروض اكسب 25% كمان يبقي بـ 5 ألاف جنيه هل ينفع تتباع بـ 14 الأف جنيه؛ حجم الاستغلال في السوق المصري مرعب والمواطنين متباعين ومتسلمين تسليم أهالي للتجار الجشعين".

وواصل: "أنا بدي مثال على تليفون محمول أو قميص أيه اللي يخلي التاجر الجشع يكسب في الحاجة ألف في المية؛ ايه الرغبة في الجشع اللامتناهي؛ لا يوجد سقف للربح في البلد دي ولازم الدولة تضغط هاتي فاتورة الاستيراد للمنتج دة واقفة عليك بكام؟ 800 جنيه بالضرائب والجمارك؟ ازاي تبيعها بـ 6 ألاف جنيه".

وأكمل: "اللي انا بتكلم عليه أنه لابد من رقابة حادة في الأسواق احنا متسلمين لكل التجار والدولة المصرية لديها الأدوات القادرة على ضبط الأسواق".

وكانت أسعار السلع قد ارتفعت بشكل كبير منذ اندلاع الأزمة الروسية الأوكرانية وهو ما أثر على المواطن المصري بشكل كبير خاصة وأن كافة السلع قد شهدت ارتفاع في الأسعار.