عمرو أديب: المعارضة قررت تفتت الأصوات في انتخابات الرئاسة
طالب الإعلامي عمرو أديب؛ المرشحين المحتملين لانتخابات الرئاسية المقبلة بعدم طرح مسالة عودة جماعة الإخوان الإرهابية إلى المشهد السياسي على الإطلاق.
وقال أديب خلال برنامج "الحكاية" المذاع على قناة "أم بي سي مصر": "المعارضة المصرية عندها قرار واضح أنها متقفش ورا مرشح؛ في أحمد الطنطاوي والأستاذ فريد زهران والاستاذة جميلة إسماعيل قررت ترشح نفسها وبقي فيه تلاتة".
وأضاف: "لو الوضع دة كمل كدة يبقي الناس دي خدت قرار أن الناس دي قررت كل واحد يبقي لوحده؛ كان ممكن يعملوا تكتل انما لا كل واحد قرر يبقي لوحدة ودا تفتيت واضح لقوى المعارضة في مصر؛ هما خدوا القرار دة ليه؟ أنا معنديش معلومة بس عندي التفسير؛ التفسير الأول أنه أنا مش مستعد أضحى لصالح حد؛ التفسير التاني أنه قد يكون أنهم اتفقوا أن دي يبقي في معارضة كبيرة ويبقي دا الهدف من الانتخابات مش الهدف أني أكسب".
وتابع: "محدش يقولي هيغيروا رأيهم؛ هيغيروه امتي؟ الشهرين دول فيهم أسبوعين أنت متكعبل عشان تلم التوكيلات؛ وقدامك شهر ونص بالله عليك ازاي هتحكم مصر في شهر ونص؛ الناس دي ياجماعة قعدت وقت كبير تفكر هنقف ورا حد ولا نرشح حد".
وأوضح: "جائز في الشهر ونص دة يحصل شيء غير متوقع؛ من كان يوم كان في مناظرة للحزب الجمهوري وكان في تسعة واقفين على المسرح وكل الناس كانت متوقعة أن حاكم فلوريدا هيكسر الدنيا خلصت المناظرة الناس قالتلك الراجل دة مش عايزينه".
وواصل: "وارد جائز حد يطلع يتطلع والناس تقف وراه؛ الكتلة اللي ورا الرئيس عبد الفتاح السيسي واضحة وعارفة عايزة ايه؛ الناس اللي مش هترشح الرئيس عبد الفتاح السيسي بتدور على مرشح؛ لو كان في بديل واحد كان كلهم أدوله ودلوقت التفتيت وتظل الكتلة اللي موجودة هنا دي واضحة حتى الناس اللي طالعة منها هتدور على واحد من تلاتة ودة هو التفتيت".
وذكر: "الموضوع التاني من جوة المعارضة وهو التشكيك؛ الناس اللي مش هترشح الرئيس عبد الفتاح السيسي بتقول طبعا مسرحية وعايزين تكملوا المشهد؛ أحمد الطنطاوي هو السيخ وأكثر الناس حدة في التعبير عن رأيه؛ التشكيك مش جاي من المولاه".
واختتم: "بالنسبة لأحمد الطنطاوي طلع الدكتور علاء الأسواني وقال الجملة الشهيرة انا مش اخوان بس بحترمهم وقال أنا مش مع احمد الطنطاوي بس بحترمه وقال بالنص كل واحد بيقول حاجة بيبقي عنده مشاكل اشمعني احمد الطنطاوي يعني؟ قال بيقول زي ما يقول ودخل وخرج محدش قاله أنت فين؛ انت بتعمل ايه في الراجل دانت خلصت عليه".
