مصطفى بكري يوجه رسالة إلى الرئيس السيسي بسبب غلاء الأسعار
وجه الإعلامي مصطفى بكري؛ رسالة إلى الرئيس عبد الفتاح السيسي، مشيرا إلى أن المواطن المصري أصبح يعاني بسبب غلاء الأسعار بشكل غير طبيعي.
وقال بكري خلال برنامج "حقائق واسرار" المذاع على قناة "صدى البلد": "الأسعار زادت مرة أخرى؛ بعد إعلان الزيادة في المرتبات أصحاب اللاضمير بدأوا مجددا؛ الناس هتستحمل إيه والا ايه؟ الناس تعبت واحنا بنطالب ياحكومة باجراءات عملية الناس تحس بيها في الأسواق".
وأضاف: "أنا بستغرب سايبين الناس دي تقطع في الشعب المصري كدة ليه؟ كل واحد بمزاجه مش هينفع أني أسكت على هذا الأمر لأن دة بيجهض كل حاجة؛ وعايز أقول للرئيس عبد الفتاح السيسي الناس مش ناسية مواقفك ولا ناسية الإنجازات بس الناس عتبانة على الأسعار؛ الناس تعبت وأنا مدرك تماما أنك بتسمع أصوات الناس وشفت الناس بس الإجراءات العملية اللي تحت بتقول مفيش حاجة تتعمل".
وتابع: "سايبين الناس فريسة للتجار والمستغلين والناس تعبت؛ تعب الناس دة بيبقاله مردود سلبي؛ احنا عايزين نخفف عن الناس؛ الناس في أزمة؛ النهاردة لما أوقف تصدير البصل دة قرار جيد يحسسني أن الدولة بتحس بحاجة زي كدة؛ النهاردة معقول البصل بتلاتين جنيه؟ ليه هو تفاح؛ الطماطم بـ 25 جنيه ليه؛ دي في أرضنا وزاعتنا".
وواصل: "في استغلال وترك الحبل على الغارب؛ والكلام دة مينفعش مع شعب فقير؛ المواطن المصري هيعمل ايه والا أية والغلبان هيعيش ازاي بالطريقة دي؟ احنا عندنا حاجات جميلة ورائعة ولكن مشكلة الأسعار مشكلة حياتية؛ وطعام الناس مشكلة حياتية؛ احنا عايزين الستر بس والناس تتستر".
وأوضح: "احنا عارفين أن تمن بندفعه وغلاء نتيجة التداعيات الخارجية ولكن احنا بنتكلم عن التجار المستغلين؛ هو مفيش حد ممكن يتقبض عليه ويتحاكم؟ هو مفتشين التموين فين؟ أي مفتش تموين ميقومش بمهمته المفروض يروح بيته أو يحاكم".
وأكمل: "نحتاج لإجراءات عملية لوقف الارتفاع الجنوني في الأسعار وتقديم أي حد يستغل لأن دة يهدد الأمن القومي إذا حبيت الم البلد الحكومة لازم تتحرك في هذا الاتجاه وحقيقي الأوضاع تستحق أننا نقف بكل قوة ونساعد أننا نتجاوز الازمة".
