تامر أمين عن أسعار البصل: "اللي يعوزه البيت يحرم على التصدير"

أشاد الإعلامي تامر أمين بقرار الحكومة المصرية بوقف تصدير البصل من أجل احداث التوازن في الأسعار بالأسواق.

وقال أمين خلال برنامج “أخر النهار” المذاع على قناة “النهار”: “النهاردة اجتماع مجلس الوزراء برئاسة الدكتور مصطفى مدبولي كان اجتماع مهم؛ الاجتماع كان دسم وساخن وخرجت منه قرارات وتوجيهات مهمة؛ أول حاجة القرارات المتعلقة بسلعة البصل”.

وأضاف: “أول حاجة هتكلم فيها هي القرارات المتعلقة بسلعة البصل لأن دة معناه أن مجلس الوزراء مش في وادي منعزل؛ لو المجلس مش واخد باله أن المواطن يعاني في سلعة؛ وسلعة البصل دي مش سلعة والسلام دي من السلع المهمة جدا في مائدة أي أسرة مصرية”.

وتابع: “البصل لما يحصل فيه أزمة في الشارع لازم الحكومة تتفاعل؛ البصل كان فيه أزمة لدرجة أن كيلو البصل وصل إلى 25 جنيه ولما سالت عرفت أن 25 جنيه في البصل دة رقم مهول ودا مينفعش؛ ومينفعش حد يقول شوفوله بديل”.

وواصل: “شفت بعض الإعلاميين يقولك طيب البصل علي شوفوله بديل؛ مش زي العيش غلي فناكل بسكوت؛ بلاش الكلام دة؛ الحكومة درست وقالت إن واحد من الأسباب اللي أدت لارتفاع سعر البصل كانت فارق العروة الصيفية والشتوية”.

وأوضح: "اللي عجبني أن الحكومة تدخلت وقالت هنوقف تصدير البصل لمدة 3 أشهر عشان اللي كان طالع برة يدخل السوق المحلي ويحصل وفرة في المعروض يحصل وفرة في المعروض؛ لأن اللي يعوزه البيت يحرم على التصدير بقي الأجنبي ياكل بصلي وأنا مش لاقيه؟ بقي الأجنبي يعيط من بصلي وأنا نفسي أدمع؟".

ووافق مجلس الوزراء خلال اجتماعه اليوم على إيقاف تصدير البصل لمدة ثلاثة أشهر، تنتهي آخر هذا العام، وذلك في إطار ضبط الأسعار في الأسواق.

وشهدت أسعار البصل خلال الساعات القليلة الماضية تحركا جنونيّا غير مسبوق، أشعل الأسواق المصرية وشكل أزمة لدى المواطنين؛ نظرا لكونه الخضار الأكثر استخداما عند الشعب المصري.

ووفقا لخبراء فإن هناك عدة أسباب لارتفاع أسعار البصل أبرزها الفارق بين العروات والتغيرات المناخية بالإضافة إلى التصدير.

وتحقق مصر الاكتفاء الذاتي من البصل؛ إذ تنتج ما يزيد عن 3 ملايين طن وتستهلك ما يزيد عن 200 مليون طن.