معركة انتخابات الزمالك.. عمر هريدي يطلب مناظرة لبيب: "مدخلش انتخابات رائد الفصل"

طلب عمر هريدي، المرشح في انتخابات مجلس إدارة نادي الزمالك على منصب الرئيس؛ إجراء مناظرة مع حسين لبيب المرشح المنافس على المنصب.

وقال هريدي في مقابلة مع برنامج "البريمو" المذاع على قناة "تن": "أنا دخلت الانتخابات بتحدي وبقول للكابتن حسين لبيب تعالي ناظرني؛ المناظرات موجودة في كل دول العالم وبندعو أهو وبقول تعالي يا كابتن حسين نناظر بعض تعالي أتكلم وقولنا عندك ايه من أفكار".

وأضاف: "في تجهيزات تحت الستار للدفع في اتجاه كابتن حسين لبيب وهو لم يترشح في يوم من الأيام رائد في الفصل؛ مدخلش العملية الانتخابية من قبل؛ أنا بقول دائما تحدث حتى أراك؛ تعالي نتكلم ولكن أنا مش شايف عنده رغبة للمناظرة".

وعن مقترحاته لتنمية موارد نادي الزمالك في ظل أزمته المالية، قال هريدي: "مشاكل نادي الزمالك بالدرجة الأولى المال والنظام؛ احنا محتاجين عمل مؤسسي داخل النادي عشان يبقي جيل بيسلم جيل وتكون في دورة مستندية سليمة".

وتابع: "بناء نظام داخل نادي الزمالك محتاج بالكتير شهرين وأن تعيد تأهيل الموظفين لأنهم من يوم ما اتعينوا متعملش ليهم أي تدريب؛ الموظف في النهاية مأمور من الإدارة المنتخبة؛ لو الإدارة المنتخبة عندها قناعة لتطوير العنصر البشري كان الموظفين اليوم في مصاف تاني".

وأوضح: "الموظفون عندهم استعداد للتطوير ولكن خدني بقي في المكان الصح بحيث يكون في ثواب وعقاب؛ بالنسبة للمسائل المالية في النادي عندنا 850 مليون جنيه مستحقات للضرائب والتأمينات والكهرباء؛ مفيش نادي معندهوش مشكلة مع الضرائب".

وواصل: "الضرائب المتراكمة على نادي الزمالك أو الأندية الأخرى مش مسؤولية الإدارة دي ولا اللي قبلها ولكنها متراكمة من 25 سنة؛ الموارد في النادي تسمح بالسداد شرط حسن استخدامها؛ المسألة محتاجة ادارتي التسويق والاستثمار ودي مش موجودة عندنا في الزمالك".

واختتم: "عندنا الكوادر البشرية من أبناء نادي الزمالك وعندنا أسماء كبيرة في مجال التسويق والاستثمار؛ واللي عامل مشكلة بردو القانون 71 وهو مازال يضع عراقيل في فكرة الاستثمار؛ أداني صلاحية الاستثمار ورجع اخد مني بضوابط عنيفة جدا".