عمرو أديب يوجه أسئلة لمرشحي الرئاسة: أنتظر الرد عليها في برامجكم
طالب الإعلامي عمرو أديب؛ المرشحين لانتخابات الرئاسة بطرح برامجهم الانتخابية وتوضح طريقة تعاملهم مع القضايا التي تهم المصريين.
وقال أديب خلال برنامج "الحكاية" المذاع على قناة "أم بي سي مصر": "أي انتخابات بيكون فيها البرنامج الانتخابي؛ البرنامج الانتخابي؛ طيب البرنامج دة هيكون فيه ايه؟ أنا كتبت حاجات أنا عايز أعرفها لأي مرشح رئاسي وأنا لازم اعرف ماذا ستفعل لما تبقي رئيس جمهورية قولي أنا هعمل واحد".
وأضاف: "ماذا ستفعل في سد النهضة؛ أي حد جاي يرشح نفسه لازم يقولي هيعمل ايه؟ ماذا ستفعل في الديون البلد عليها 165 مليار دولار ديون؛ الدولار وسعر النقد الأجنبي هل هتسيب الدولار سايب كدة ولا هتثبته".
وتابع: "الدعم السلعي هل ستبقي على الدعم السلع أم ستغيره؛ بيع الأصول والأسعار والأجور هل هتزود الأجور أو هتقللها؛ أنا عايز تقولي هتعملها ازاي وهتقلل الأسعار ازاي؛ الأجور هضاعفها طيب ازاي وهتجيب منين".
وواصل: "احنا كمواطنين من حقنا في أي حتة في العالم الناس اللي عندها انتخابات لازم يكون في برامج انتخابية لكن لو مش عايزين بلاش أنا بقولكم الدنيا بيتعمل فيها اية".
وأكمل: "أي انتخابات في الدنيا بيجي المواطن يقول أنا هعملكم كذا؛ موقفك اية من الحبس الاحتياطي؟ برة لما يجي حد يقول أنا مش هرفع عليكم الضرايب لو جه ورفع الضرايب الناس بتقوله بص أنت قلت مش هرفع الضرائب".
وأوضح: "ما الموقف من الحريات؟ مثلا الأستاذ عماد جاد كتب رأي ما أول أمبارح ولقيت الناس كلها كاتبة ايه قالتلك بس دة بكرة يقبضوا عليه؟ ليه بكرة يقبضوا عليه؟ الرأي يترد عليه برأي ولكن ايه فكرة أن أي حد هيتكلم في السياسة هيتقبض عليه".
وذكر: "انت مش محتاج تبقى عندك مشكلة مع رأي؛ عماد جاد قال رأي ايه اللي حصل في مصر؟ أنت شفت الناس نزلت في الشوارع؟ من حق الناس تقول رأيها وتتكلم؛ وبعد السوشيال ميديا مبقاش في شيء ممكن يتمنع".
واختتم: "أنت عندك مشكلة مع عماد جاد قوله يا عماد أنت غلط أنا مع الرئيس عبد الفتاح السيسي أو أنا مع أحمد الطنطاوي مش لازم يبقي في انطباع عام أن اللي يقول رأيه ويتكلم في السياسة يتحبس؛ ازاي هيكون في انتخابات رئاسية من غير ما نتكلم في السياسة؛ الديموقراطية اية يا جماعة؟ حرية الاختيار اللي هو قررت أختار سين وبدل صاد".
