مصطفى بكري يرد على عماد جاد: "قلبت ليه؟ أيه اللي حصل؟"
علق الإعلامي مصطفى بكري؛ على تصريحات الدكتور عماد جاد؛ المتحدث باسم التيار الليبرالي الحر حول تحديد فترة انتقالية يرأسها أحد قادة الجيش السابقين.
وقال بكري خلال برنامج "حقائق وأسرار" المذاع على قناة "صدى البلد": "اليومين اللي فاتو أخونا عماد جاد؛ اللي بيتنقل من حزب إلى حزب طلع بتفنيده جديدة وقالك الرئيس القادم هو فلان وحدد شخصية معينة لا ليها علاقة بحاجة ولا بيفكر في حاجة".
وأضاف: "قالك دة هاتوه رئيس لفترة انتقالية وبعده رئيس مدني بعدما نفتح المجال العام سعادتك حددت شخص معين وقلت نجيبه رئيس هذا ليس من حقك؛ أنت ممكن تقول ممكن نفتح المجال لأي حد يترشح وإنما حضرتك عملت خارطة طريق دا يجي رئيس ونعمله فترة انتقالية أنت لسة عايز فترة انتقالية تاني؟".
وتابع: "أنت بأي معني تكلم عن مدني والا عسكري؛ هو في عسكري بيسيب الجيش وميبقاش مدني؟ أنت دخلت الجيش وأنا دخلت الجيش؛ هل دة معناه أننا كلنا عسكريين؟ أنا شفت قادة في الجيش مشفتهمش في أي حته من حيث الفكر والطرح والرؤية والانجاز والأمثلة تبهرك؛ دا جيش مصر العظيم دا الجيش اللي دخلت أكاديمية ناصر العسكرية ودخلت كلية الدفاع الوطني".
وأكمل: "قالك يجي فلان دة رئيس انتقالي واحنا مصر بحاجة إلى رئيس جديد يبني البنية الفوقية ويعيد لمصر هيمنتها؛ البنية الفوقية اية الإصلاح السياسي؟ طيب ما هو في الحوار الوطني وسيادتك موجود فيه".
وواصل: "أنا برجع بيك لواحد تسعة 2023 الكلام دة أنت قايله في موقع تحيا مصر؛ قلت إلا يوجد على الساحة من يستطيع منافسة الرئيس السيسي في الانتخابات الرئاسية القادمة وأن الرئيس قام بحماية البلد والقضاء على الإرهاب كما أنه وضع أساس قوي لبنية تحتية تليق بدولة مثل مصر؛ لكن تبقى البنية الفوقية وفتح المجال العام والمجال الإعلامي؛ الرئيس بني بنية تحتية رائعة وعليه أن يبدأ في البنية الفوقية".
واختتم: "الكلام دة لسة في شهر تسعة؛ قلبت ليه طيب ايه اللي حصل؛ الحقيقة أنا بستغرب زي ما استغربت بتصريح ليك في يوم من الأيام أشادت بيه بدور إسرائيل في أحدث ثورة 30 يونيو وطالبت الشعب بالموضوعية عند الحديث عن إسرائيل؛ بقى إسرائيل هي اللي ساعدتنا في 30 يونيو يا اخ عماد؟".
