أول رد من عمرو أديب على هجوم الأحزاب عليه: "أعضائكم قد أيه في البرلمان"

رد الإعلامي عمرو أديب على هجوم عدد من الأحزاب على تصريحاته الأخيرة بشأن ضعف الحياة الحزبية في مصر.

وقال أديب خلال برنامج "الحكاية" المذاع على قناة "أم بي سي مصر": "لقيت ردود فعل كثيرة منها أكثر من 10 أحزاب مطلعين ردود أو بيانات على الكلام اللي قلتله امبارح؛ الأول كنت عايز أكون دبلوماسي وتعدي الموضوع ولكن أنا حسيت أنه لا؛ لازم أقول رأيي اللي مقتنع بيه وأكيد الناس شايفة".

وأضاف: "جايز الأحزاب لما ترد عليا بتقول إن الأحزاب موجودة والمعارضة موجودة وأنت بس اللي مش شايف كان ممكن أقول أيوة فعلا في حركة وأحزاب على الأرض بتشتغل بس أنا مش واخد بالي".

وتابع: "أشد وعندي يقين؛ أنه بالكتير مش هتقدر تذكر أسامي لخمس أحزاب والشاطر هيقول ستة والمتخصص هيقول سبعة ومع احترامي للأحزاب اللي علقت أنا رأيي أن مفيش حياة حزبية في مصر؛ الأحزاب لا دور لها؛ اللي مستغربة أن الناس بتقول أنت مش شايف ولا أيه؟ ممكن أقولك إن في مصر في أربع خمس أحزاب لها نشاط؛ وأنا اتحدي الأحزاب تنشر عدد العضوية".

وأكمل: "أنتوا آخر مرة شوفتوا تجمع حزبي في مكان أمتي؟ غالبية الأحزاب في مصر غير موجودة؛ لقيت ناس بعتالي أنت مش شايف الديموقراطية اللي عايشينها؟ نعم في ديموقراطية ولكن في خطواتها الأولى".

وواصل: "لن تنتزعوا مني اعتراف أن هناك حياة حزبية في مصر؛ الأحزاب بتقولي أنت مش شايف الحركة الديموقراطية في الحوار الوطني؟ طيب لو مفيش الحوار الوطني ايه البديل؟ اسأل الأحزاب دي كلها عدد أعضائكم في مجلس النواب أو الشيوخ قد ايه؟؛ أنت لغاية النهاردة مش عارف تطلع مرشح لانتخابات الرئاسة".

وأوضح: "في الكادر بتاعك؟ المناظرة الأخيرة اللي اتعملت من فترة واللي ترامب مرداش يحضرها كان واقف تسعة بيتنافسوا على واحد يترشح عن الحزب الجمهوري؛ وأنت عندك حزب رئيس الحزب قال انا اللي هترشح".

واختتم: "رموز المعارضة حتى الآن لم يتفقوا على مرشح لانتخابات الرئاسة؛ أنا محتاج أشوفك وأسمعك وأعرف أن في تكتل؛ وتقولي في الرئيس عبد الفتاح السيسي اللي موجود الأن وفي حد تاني؛ وحتى الآن محدش طلع بيقولك أنت بتسبق الأحداث؛ استبق ايه الانتخابات بعد بكرة".