عمرو أديب يطالب إعلام الدولة بالتوقف عن تأييد أي مرشح في انتخابات الرئاسة

طالب الإعلامي عمرو أديب وسائل الأعلام التابعة للدولة بالتوقف عن تأييد أي مرشح خلال الفترة المقبلة مشيرا إلى أن دعم أي مرشح على حساب الاخر أمر غير مقبول.

وقال أديب خلال برنامج "الحكاية" المذاع على قناة "أم بي سي مصر": "أنا عايز أشوف حد شخصية حكيمة كدة يقول للناس تعالوا نتفق احنا الماتش دة هيتلعب ازاي؛ أنا عارف هخلص من هنا وهلاقي تلات أربع انفار بيقولوا هو عمرو أديب عايز أيه هو أكيد بيقول لازم تختار السيسي عشان الاستقرار؛ انا مبقولكش كدة؛ خد اللي أنت عايزه ونقي اللي أنت عايزه".

وأضاف: "لازم نتفق على أنه مش كل شوية نقلب الكوتشينة من تحت ونقوم؛ انا قلت الكلمة دي من كام شهر احنا كدة نقلق من الوضع دة؛ لو ناويين كدة قولولنا هننزل نجري ورا بعض في الشوارع تاني قولي بقي عشان أنا كبرت".

وتابع: "الانتخابات الرئاسية والناس موجودة وعندي طلب هيضايق ناس كتير وأنا واضح أهو وش؛ وعلى فكرة أنا في لندن وراجع بكرة أو بعده أنا لا هربان ولا موقوف؛ أنا مش برة وهربان وبقول كلام؛ لازم بعد أسبوع أو اتنين أو تلاتة تتوقف الوسائل الإعلامية المملوكة للدولة عن تأييد أي مرشح".

وواصل: "تغطية أخبار أي مرشح هذا أمر أفهمة ولكن أن تصدر صفحات جرايد ومحطات تقول احنا مع فلان دا مش هينفع؛ بصوا يا جماعة الموضوع مش صعب خلينا نعملها كويس؛ لو سألتني الانتخابات الجاية مين هيكسب هل دة سؤال صعب؟ لغاية النهاردة اللي أنا شايفه قدامي مفيش نسب قريبة".

وأكمل: "أنت عايز تقولي إن دة 5% ولازم ناخد بالنا من الأصوات في بنها أو الأقصر احنا بنتكلم عن انتخابات نتيجتها تقريبا؛ ألا لو في بقي تكتل وفي ناس دخلت ورا مرشح واحد أو كلام يوصل للعقل أو حاجات مهمة تحصل ونبتدي نشوف منافسة؛ إيه العيب أنه يبقي في منافسة".

وأعلنت عدة أحزاب سياسية عن الدفع بمرشحين لانتخابات الرئاسة المقبلة بينما لن يعلن الرئيس عبد الفتاح السيسي حتى الان الترشح لولاية جديدة.