محمد الباز ينتقد مصطفى قمر: "لازم يتحاكم"
أنتقد الإعلامي محمد الباز؛ المطرب مصطفى قمر على خلفيه هجومه على الناقد الفني طارق الشناوي مشيرا إلى أن رد قمر لا يليق به كفنان وأنه يجب أن يعتذر.
وقال الباز برنامج "أخر النهار" المذاع على قناة "النهار": "معركة غريبة حصلت؛ طرفي المعركة هما النجم مصطفى قمر والناقد الكبير الاستاذ طارق الشناوي؛ الأستاذ طارق الشناوي ناقض مرموق تختلف أو تتفق معه الراجل وراه تاريخ طويل من العمل الصحفي والكتابات النقدية ولايزال يحتفظ بحيويته ونشاطه ويتابع كل صغيرة وكبيرة".
وأضاف: "الملاحظ في الأستاذ طارق الشناوي أن الراجل لا يتودد إلى النجوم؛ لما دخل شاف الجزء التاني بتاع أولاد حريم كريم؛ فيلم حريم كريم دا كان فيلم لطيف ومبهج كده وجم بعد سنين قالك نعمل الجزء التاني".
وتابع: "سيبك أن دة في حد ذاته بيبقي افلاس؛ الأستاذ طارق الشناوي كتب أن الفيلم سيء وملوش علاقة بالسينما؛ فالأستاذ مصطفى قمر كتب حاجة غريبة جدا؛ طارق الشناوي قال رأيه حتى لو رأي حاد".
وأوضح: "مصطفى قمر رد عليه وقال هو انا مش طلبت منك تبعد عني اصلا وماتتكلمش عني علشان ماتتهزأش.. طيب انت اللي جيبته لنفسك. عموما ياللي اسمك طارق انت كاتب كلام أهبل يدل للمرة المليون أنك ماشفتش الفيلم، وعموما اللي حيرد عليك جمهور السينما الحقيقي اللي دخل الفيلم، اللي مالوش دعوة بالنفاق او مصلحة اي حد تاني (فكرني كدة شغلتك ايه….؟…. هي من اريع حروف بيتهيألي".
وواصل: "في ناس كتير شككت أن الكلام دة يكون كاتبه مصطفى قمر لأنه راجل لطيف ورقيق ومبيحبش يزعل حد؛ فجأة مصطفى قمر تحول إلى بلطجي هو فتح مطوة على طارق الشناوي؛ أنا شايف أن ما كتبه مصطفى قمر عن طارق الشناوي يستوجب محاكمته في قضية سب وقذف".
واختتم: "أنا بدعو أن مصطفى قمر يعتذر لطارق الشناوي لان دة هيرمم الصورة اللي احنا راسمينها عن مصطفى قمر طول عمرها؛ الراجل معروف أن طارق الشناوي يقول ما يعتقد أنه صحيح لكن أنت ترد بهذه الطريقة السوقية البذيئة؛ لا تليق بيك".
