تامر أمين يطالب الدولة بتبني خطة لنشر "المراحيض العامة"
أشاد الإعلامي تامر أمين؛ بقرار الحكومة دراسة نشر أجهزة تعالج توقف القلب في دور العبادة والمولات والأماكن العامة لعلاج الحالات الطارئة.
وقال أمين خلال برنامج "أخر النهار" المذاع على قناة "النهار" تقديم الخدمة العامة للناس أينما كانوا؛ الفكرة ممتازة تخيل لو حد ماشي في المول أو في المسجد وحصلت له الحكاية دي ولقي الجهاز واستخدمه وبقي كويس هيقول ايه؟ تفكيرك ساعتها هيقول ايه؟ هيقول عمار يا مصر دي بلد فكرت فيا وفي صحتي".
وأضاف: "فكرة الأمان لازم تكون شائعة ومفيش أهم من فكرة الأمان والصحة وأتمنى أن الدراسة والتنفيذ مياخدش وقت".
وتابع: "بما أننا يا حكومة لقطنا طرف الخيط وهنشتغل عليها؛ فكرة الانسان في الشارع المواطن المصري في الشارع إيه الحجات اللي يحتاجها المواطن في الشارع واللي لازم تكون موجودة في ومتاحه؛ حاجات كتير ولكن أبسطها على الإطلاق دورة المياه؛ أو الحمام"
وواصل: "محدش يستهيف الكلام اللي بقوله؛ أدمية الانسان بتبتدي من هنا؛ حقوق الانسان تبدأ من أن أنا أعيش؛ ينفع أعيش محصور أو تعبان؟ عبقري اللي سمى الانسان بيت الراحة ولازم يبقي الحمام موجود في الشوارع والميادين بكثرة ومتاحة وأدمي".
وأوضح: "هتتعمل ازاي؟ هتقولولي لو اتعملت هتتبهدل وتفشل؛ صح ولكن الحل أني أعملها بشكل تجاري رمزي؛ زي ما هو معمول في أوروبا؛ برة في أوروبا تلاقي كابيه مربع كدة فيها الحمام وعلى بابه في ماكينة صغيره تحط فيها اليورو والباب يتفتح".
وأكمل: "دي لو اتعملت عندنا بخمسة جنيه أو عشرة جنيه؛ وتلاقي مكان نضيف معتقدش هيبقي فيها أي مشكلة؛ ولما كل الاتاحات دي تزيد ووسائل الراحة للمواطن يزيد مستوى المعيشة هتزيد ومستوى الرضا يزيد".
وذكر: "مهم أوي الناس تدفع الالتزامات اللي عليها ولكن في المقابل مهم أن الناس تاخد خدماتها العامة باحترام وأدمية وكرامة وهو اللي بنسميه في علم الاجتماع مستوى المعيشة؛ في ناس دخلها بسيط في أوروبا ولكن عشان بتلاقي كذا بسعر معقول فعايشة كويس".
وكان الدكتور خالد عبد الغفار، وزير الصحة والسكان، قد أعلن عن خطة تستهدف تبني نشر أجهزة إزالة الرجفان القلبي بالأماكن العامة وفي مقدمتها المطارات، والمولات، والحدائق، والمتنزهات، ودور العبادة الكبرى.
