مصطفى كامل يتوعد مطربي المهرجانات: "المذبحة ابتدت"
أكد الفنان مصطفى كامل، نقيب المهن الموسيقية، أنه لن يسمح بأي تجاوزات من منتسبي شعبة الأداء الصوتي، مشيرا إلى أن من يخطئ سوف يحاسب على الفور.
وقال كامل في مداخلة هاتفية مع برنامج "على مسؤوليتي" المذاع على قناة "صدى البلد": "أنا اديت فرص كتير لكل الناس وحاولنا نحتوي الجميع؛ الفئة بتاعة شعبة الأداء الصوتي احتويت منها ناس وقعدوا فترة ملتزمين وفجأة لقيت واحد منهم خرج عن السلوك وخد بتر نهائي وقلت عليا النعمة ما هتشوفها تاني طول مانا موجود؛ طالما أنت محترمتش التعهدات وأن الكلام اللي هيغنيه لازم يمر على الرقابة".
وأضاف: "في ناس التزمت واحترمت وبعدين الدنيا بدأت تخرج عن المألوف؛ لما حسوا أني رجل حنين اوي؛ ولكن خلصت وأنا أعلنتها على صفحتي وقلت خلاص بدأت المذبحة والموضوع انتهى".
وتابع: "اللي هيغلط خلاص الموضوع انتهي في ناس بتر نهائي؛ اللي طلع يقولك عليا كذا وبيقول لفظ غير مستحب واللي يقولك عليا بأيه كله بيكدب واللي زي دة مش هينفع فيه عقاب مؤقت؛ في ناس ينفع معاها العقاب المؤقت زي عمر كمال؛ وحمو بيكا احنا احتويناه؛ والراجل فضل ماشي منضبط لحد ما لقيته مرة واحدة قلبوا غنوة أنتي معلمة؛ إلى أنتي معفنة؛ دا كده تهريج بقي".
وأكمل: "حمو بيكا موقوف أسبوع وهو حلف لي وأنا قلتله أنا اديتك الفرصة وأنت ماشي سليم ومحدش بقي بيبتزكم؛ قلتله يابني أنت في حد بيقولك هات رشوة؟ قالي لا يا أستاذ قلتله طيب ليه ملتزمتوش؛ أنا أديتهم وقف أسبوع مع 50 ألف جنيه غرامة وأقسمت بالله قلتله لو اتكررت هيبقي مصيرك زي بتاع عليا كذا كذا ده".
وأوضح: "أنا قلتلهم أنتوا كسبتوا وبتكسبوا رقي نفسك وسلوكياتك خلاص؛ وعملت معاهم كل حاجة؛ هما بيحبوني وأنا بحبهم ولكن في حاجات غصب عنهم في ناس بتستسهل؛ وأنا مانعهم من أنهم يعملوا الفيديوهات اللي كانوا بيعملوها مع بعض عشان التريند؛ السلوك دة مش مطلوب".
واختتم: "أنا هفضل احافظ على الفن في بلدي قدر الإمكان لأن دي أمانة؛ أنا قلتلهم برة أكتر من جوة لان برة بتمثل مصر كلها".
