"20 مليونا من حفلات الساحل".. مصطفى كامل يكشف عن قفزة كبيرة في موارد نقابة الموسيقيين
أكد الفنان مصطفى كامل، نقيب المهن الموسيقية، أن مجلس النقابة الحالي نجح في زيادة إيرادات النقابة بشكل كبير خلال الأشهر الماضية.
وقال كامل في مداخلة هاتفية مع برنامج "على مسؤوليتي" المذاع على قناة "صدى البلد": "أنا من ساعة ما دخلت النقابة وأنا تعبت جدا؛ وأحنا بجد تعبنا والموروث ثقيل والنقابة متعبة جدا؛ عندنا 74 ألف عضو موزعين على أنحاء الجمهورية".
وأضاف: "النقابة الوحيدة اللي كل لحظة لازم تلاقي فرقة في أسيوط أو سوهاج فمشاكلها كتير؛ أنا شفت الوضع الاقتصادي اللي حاصل في العالم وربنا يعلم الواحد بيعمل أيه وعمال أزود في المعاشات؛ رفعت المعاشات 3 مرات وفي نيتي أرفع الرابعة والخامسة".
وتابع: "في شهر ستة قلت لأعضاء النقابة إيرادات حفلات الساحل الشمالي كانت 3-4 ملايين جنيه ولما استلمت النقابة في شهر 10 كانوا بيتفاخروا أنهم حققوا 7 ملايين جنيه وأنا شكلت مجموعة من الشباب وطلبت هدف وقلتلهم لو محققتش من الساحل الشمالي 20 مليونا فيما فوق أنا هسيب النقابة وأمشي".
وأكمل: "احنا النهاردة 3-9 وموارد الساحل 20 مليونا و280 ألف جنيه ولم ينتهِ الموسم الغنائي في الساحل الشمالي؛ احنا جددنا بشباب جداد والمفاجأة أنهم من خريجي أعلى جامعات مصر؛ أنا مستلم النقابة وكان فيها 69 مليون جنيه والنهاردة النقابة فيها 144 مليون جنيه".
وواصل: "أنا خدت قرار مجلس من 3 أيام أن في منحة مالية لزملائنا اللي عندهم ولاد في المدارس مع دخول المدارس؛ الكلام ده مكانش موجود ولا منحة العيد ولا قبل رمضان كان موجود؛ اجتمعنا وعملنا دعم عيني قبل رمضان ووزعنا بونات لشراء السلع".
وأوضح: “أنا اديت فرص كتير لكل الناس وحاولنا نحتوي الجميع؛ الفئة بتاعة شعبة الأداء الصوتي احتويت منها ناس وقعدوا فترة ملتزمين وفجأة لقيت واحد منهم خرج عن السلوك وخد بتر نهائي وقلت عليا النعمة ما هتشوفها تاني طول مانا موجود؛ طالما أنت محترمتش التعهدات”.
واختتم: "في ناس التزمت واحترمت وبعدين الدنيا بدأت تخرج عن المألوف؛ لما حسوا أني رجل حنين؛ ولكن خلصت وأنا أعلنتها على صفحتي وقلت خلاص بدأت المذبحة والموضوع انتهى".
