الجنيه مبقاش يجيب بصلة.. محمد خير يعلق على ارتفاع أسعار الخضر والفاكهة

علق الإعلامي محمد علي خير، على الارتفاع الجنوني في أسعار الخضروات والفاكهة على الرغم من تحقيق مصر للاكتفاء الذاتي في مثل هذه المحاصيل، قائلا “الجنيه مبقاش يجيب بصلة”.

وقال خير خلال برنامج “90 دقيقة” المذاع على قناة “المحور”:  "أيه اللي حصل في أسعار الخضار؛ احنا النهاردة بنتكلم عن كيلو ونص بطاطس بعشرين جنيه وكيلو بصل كان بثلاثة جنيهات السنة اللي فاتت وبقي بـ30 جنيها بتكلم على محاصيل كتيره أسعارها زادت؛ أيه السبب؟ مصر تتمتع بوفرة من المحاصيل الزراعية في الخضار والفاكهة".

وأضاف: "ايه اللي يخلي الأسعار تنفلت؟ قلت إن زودنا شوية في التصدير وقلت ارجع للأرقام؛ لقيت إن احنا مثلا زودنا من 1 يناير الماضي إلى نهاية يوليو 760 ألف طن؛ في السبعة شهور اللي فاتوا صدرنا 5 مليون طن".

وتابع: "نفس الفترة من العام 2022 كانت الصادرات 4 ملايين و250 ألف طن؛ هل الإنتاج زاد عشان نزود الصادرات؟ لا هو ده السؤال هل الإنتاج زاد عشان تزود صادرات؟ الواحد يفرح عشان أي رقم يزيد في الصادرات ولكن خلي بالك لو سحبت من السوق المحلي وقللت المعروض الأسعار هتزيد".

وأكمل: "لقيت أننا صدرنا حاجات كتير أوي؛ صدرنا 900 ألف طن بطاطس والسنة اللي فاتت 800 ألف طن؛ هل احنا انتاجنا زيادة والا احنا سحبنا من السوق والسعر ارتفع؟ لازم هنا هيئة ما أو حد يظبطلي السوق؛ ماشي أكيد اللي بصدره بخده دولار بالمنطق ده مانا اسحب بقي الخضار اللي في السوق وأصدره وأقول احنا جالنا دولار".

وأوضح: "لما ترفعلي كيلو ونص البطاطس إلى 20 جنيه وكيلو البصل إلى 30 جنيه والجنيه النهاردة مبقاش يجيب بصلة أنا مع الصادرات ومحتاجين عملة صعبة؛ لما أنت زودت الصادرات السنادي عن السنة اللي فاتت هل الإنتاج زاد؟ لو الإنتاج زاد حلال عليك إنما متسحبليش من السوق المحلي".

وارتفعت أسعار الخضر والفاكهة خلال الأيام الماضية بشكل غير مسبوق؛ وأرجعت شعبة الخضر والفاكهة بالغرف التجارية هذا الارتفاع إلى ارتفاع درجات الحرارة التي أثرت على إنتاجية المحصول.

وأشارت الشعبة إلى أن الأسعار تخضع أيضا إلى العرض والطلب والتداول في أسواق الجملة وأسواق التجزئة.