بعد عرض اتحاد جدة الخيالي.. تامر أمين يوجه رسالة إلى محمد صلاح
علق الإعلامي تامر أمين؛ على مفاوضات نادي اتحاد جدة السعودي من أجل ضم النجم المصري محمد صلاح لاعب ليفربول الإنجليزي.
وقال أمين خلال برنامج "أخر النهار" المذاع على قناة "النهار": "حديث الساعة وكل ساعة خلال الأيام الماضية مازالت عن فخر العرب محمد صلاح؛ دلوقت فكرة انتقال محمد صلاح إلى السعودية مش بقت شائعة ولكن واقع؛ مش الانتقال ولكن الحديث عن انتقاله بقي واقع وكلام أقرب من الجد وتفصلنا ساعات عن الحسم".
وتابع: "الموضوع في الأول كان شائعات وبعد الشائعات كان عرض رسمي وبعد كدة قلنا لا أكيد صلاح مش هيروح خصوصا أننا سمعنا أنه مش هيروح؛ ثم اتحاد جدة رفع العرض وسمعنا أن إدارة ليفربول موافقة على العرض لأنه عرض كبير؛ ثم سمعنا أن صلاح ابتدا يشاور عقله بعد ما رفع اتحاد جدة العرض لأرقام مش عايز أقولها لأن الكلام ابتدا يتحول إلى نبر وعين ربنا يحمي صلاح منها".
وواصل: "الناس ابتدت تكلم بالتفاصيل؛ القصر اللي هيسكن فيه يسوى كذا والعربية تسوى كذا؛ نبر بقي وعين ربنا يحمي صلاح منها سواء قبل العرض أو مقبلش؛ ربنا يحرسه من العين يارب؛ هو عرض خرافي يلف دماغ أي بني أدم".
وأوضح: "في النهاية زي ما قلتلكم القرار قرار صلاح؛ والمستقبل مستقبل صلاح؛ وبلاش نبقى أوصياء على صلاح دلوقت لأننا مكناش أوصياء عليه زمان لما كان في المقاولون وقلناله أطلع إلى بازل؛ ربنا اللي أراد لصلاح هذا المصير وعقلية صلاح اللي وضعته في هذا المكان".
وأكمل: "كلنا ثقة في عقلية صلاح أنها ستجعله وتهديه إلى اتخاذ القرار السليم أما البقاء في ليفربول أو الانتقال إلى أي نادي أخر؛ لا أوصياء على عقل صلاح ولا هندعي الحكمة أننا عارفين مصلحته أكتر منه".
واختتم: "احنا في ضهرك يا صلاح أيا كان القرار الذي سيتخذه سواء فضلت في ليفربول أو يابو مكة رحت تعيش جنب مكة في الحالتين هندعمك ونشجعك وهتفضل فخر مصر والعرب؛ ارفعوا الضغوط من على صلاح وأنا بقولك شيل الضغوط واختار وفقا لعقليتك القرار الصح ليك ولمستقبلك ولأهلك وولادك".
