أحمد موسى: انضمام مصر إلى البريكس "زلزال سياسي"

وصف الإعلامي أحمد موسى؛ انضمام مصر إلى مجموعة البريكس بـ"الزلزال السياسي" مشيرا إلى أن هناك فوائد كثيرة ستعود على الدولة من الانضمام للمجموعة.

وقال موسى خلال برنامج "على مسؤوليتي" المذاع على قناة "صدى البلد": "أنت النهاردة كدولة موجود مع دول كبار ونظام عالمي جديد أنت النهاردة موجود ضمن النظام العالمي الجديد؛ اللي حصل أول أمبارح في جوهانسبرج زلزال سياسي".

وأضاف: "ستة دول انضموا للخمسة في مجموعة بريكس مصر واحدة من الستة الجداد؛ انت النهاردة عضو كامل العضوية من بداية يناير 2024 أهمية دة ايه؟ دانت قبل ما تنضم قالك ازاي هيخدوا مصر هي مصر اقتصادها ايه؟ لا مجاملات أبدا مفيش دولة النهاردة بتجامل دولة تانية".

وتابع: "لما يبقي 5 دول بالأجماع لازم الخمسة يوافقوا على الانضمام؛ كانت متقدم 22 دولة بطلبات رسمية؛ و40 دولة عندهم رغبة؛ في 22 دولة قدموا وطلبوا ومصر والأرجنتين والسعودية والإمارات وإيران وإثيوبيا دول انضموا خلاص وأصبحوا أعضاء".

وأوضح: "مين كمان ومتخدوش؟ عندك الكويت والبحرين والجزائر وبنجلاديش ونيجريا والسنغال وبوليفيا وبيلاروسيا وكازاخستان وهندوراس وكوبا؛ هما قرروا يخدوا 6 دول وفي مرحلة تانية يشوفوا هيضموا دول أخرى".

وواصل: "مصر اعتبارا من بداية العام القادمة عضوية كاملة وستشارك مصر في اجتماعات البريكس العام القادم اللي هتكون في روسيا العام القادم أحنا بنتكلم على تشكيل في النظام العالمي".

وأكمل: "عندك 3 دول نووية وهي روسيا والصين والهند؛ وعندك أكبر احتياطي بترول وغاز في السعودية وروسيا ومصر والإمارات وإيران؛ وفي تلت انتاج الحبوب في العالم من مجموعة البريكس".

وذكر: "بنتكلم عن قوة هائلة وحجم الناتج المحلي للمجموعة 30 تريليون دولار؛ التواجد في البريكس كان له شروط؛ احنا في مصر عملت بنية أساسية مبكرة وموانئ وشبكة طرق وملايين الأفندنة الزراعية ولديك ثقل سياسي إقليمي وعالمي وعندك علاقات متوازنة مع الشرق والغرب".

واختتم: "معندناش مشاكل مع حد وبالتالي وجودك متوازن للغاية وانت النهاردة موجود في أفريقيا ودولة عربية؛ وبقي في 3 دول أفريقية موجودة في بريكس وفي تلات دول عربية وفي إيران الناحية التانية؛ عندك تحول كبير جدا ووجودك النهاردة وشغل موقع بين اللاعبين الكبار الجدد وتبقى عارف أهمية انضمام مصر إلى التجمع".