فرج عامر: "الأهلي أنقذني السنادي ولا أنكر مواقفه الرجولية معنا"

أكد المهندس محمد فرج عامر؛ رئيس نادي سموحة؛ أن الأهلي وضع ثنائي أفريقي على راداره من أجل ضم أحدهما خلال فترة الانتقالات الصيفية.

وقال عامر خلال برنامج "على مسؤوليتي" المذاع على قناة "صدى البلد": "انا من أوائل الناس اللي توقعت أن الأهلي يجيب رضا سليم؛ لأن انا أعرف وكلاء لاعبين من المغرب؛ وهما اختاروا ليه الطريق الأفضل لأن كدة هيختصر الطريق؛ ممكن يروح حته ياخد فلوس أكتر من الأهلي ولكن في الأهلي هيظهر أكتر".

وأضاف: "أنا قلت إن الأهلي هيجيب لاعب أفريقي جديد؛ ودي معلومات ولكن ممكن تكون غلط؛ الأهلي متكتم بشكل كبير وهما عندهم بدائل؛ توقعت أن في لاعب كونغولي ولاعب سنغالي ولكن دول بديل تاني وتالت".

وتابع: "توقعت أن الأهلي هيجيب مهاجم متميز جدا في تونس تحت السن؛ بحكم خبرتي الكبيرة في كرة القدم ناس كتير بتتواصل معايا أنا مش بجيب معلومة من النادي الأهلي أو من مصر ولكن من خارج مصر؛ من وكلاء لاعبين وشركات كبيرة ومش بيقولوا المعلومة كاملة".

وأوضح: "المصادر اللي بتخدمني مباشرة أيديهم في الملعب وعارفين أني بعد سموحة بحب الأهلي وبحب أعرف؛ ولكن أنا عمري ما عرفت معلومة من داخل النادي الأهلي".

وعن علاقته بالنادي الأهلي قال عامر: "بعد ما بقيت رئيس نادي سموحة؛ الكابتن حسن حمدي خدمني كتير جدا ولو مكانش الأهلي ساعدني السنة اللي فاتت كنت نزلت درجة تانية؛ أنا مستفيد من علاقتي بالأهلي؛ أنا اتكلمت مع الأهلي وقلتلهم أكرم توفيق لعب 3 سنين في سموحة وكانوا زعلانين جدا من إصابة أكرم توفيق".

وواصل: "قلتلهم أنا هجيب لكم لاعب فيه كل المواصفات اللي انتوا تحبوها؛ قالوا مين قلتلهم خالد عبد الفتاح؛ قتلهم خدوه 6 شهور جربوه ولو عجبكم خدوه ولكن أدولي 3 لاعبين أنقذوني وحسام حسن أنقذني وموقف منتهي الجدعنة".

وأوضح: "كانوا عايزين مغربي السنادي وسابهولي؛ الأندية كلها محترمة ولها مواقف هايلة ولكن أنا لا أنكر فضل الأهلي ومواقفه الرجولية معانا؛ الأهلي لما بيشتري لاعب بيشتريه بسعر عادل والتعامل سلس".

واختتم: "حصل في مبالغات في أسعار اللاعبين؛ ومش شرط أشتري واحد غالي أوي يطلع أفضل واحد ياما لاعيبة جات انتقال حر إلى سموحة وحققت نجاحات كبيرة جدا".